कोरोनामुळे भारतातील आयपीएल स्पर्धा निम्म्यावरच स्थगित झाली. आयपीएल स्पर्धेतील उर्वरित सामने दुसऱ्या टप्प्यात युएईच्या मैदानात खेळवण्यात येणार आहेत. कोरोनाच्या पाश्वभूमीवर बीसीसीआयने चांगलीच कंबर कसली असून अत्यावश्यक वैद्यकीय सेवा, स्पोर्ट्स मेडिसीन सपोर्ट, स्पेशलिस्ट टेली कंसल्टेशन, डॉक्टर ऑन कॉल, रुग्णवाहिका आणि VPS हेल्थ केयर सेवा सहज उपलब्ध करुन देणाऱ्या UAE तील आरोग्य संस्थांशी बीसीसीआयने करार केला आहे.

मेडिसीन आणि कोविड 19 व्यवस्थापनासाठी 100 सदस्यांची विशेष समती स्थापन करण्यात आली आहे. जी खेळाडूंना मदतीसाठी सदोदित उपलब्ध असेल. प्रत्येक सामन्यासाठी स्टेडियममध्ये दोन मेडिकल टीम उपलब्ध असतील. या टीममध्ये डॉक्टर्स, नर्स, पॅरामेडिक्स आणि लॅब टेक्निशियनचा समावेश असेल.

IPL 2021 च्या दुसऱ्या टप्प्यात 8 टीम एकूण 31 सामने खेळणार आहेत. दुबई, शारजा आणि अबू धाबी या तीन मैदानात 19 सप्टेंबर ते 15 ऑक्टोबर या कालावधीत स्पर्धा पार पडेल.

सर्वाधिक कोरोना टेस्ट

दुसऱ्या टप्प्यातील स्पर्धेसाठी UAE मध्ये पोहचलेल्या खेळाडूंना कोरोना चाचणीला सामोरे जावे लागत आहे. दुबई आणि अबूधाबी येथील 14 हॉटेलमध्ये जवळवास 750 खेळाडू आणि स्टाफ सदस्यांच्या कोरोना चाचण्या झाल्या आहेत. नव्या कोरोना प्रोटोकॉलनुसार, सर्व खेळाडू आणि स्टाफ सदस्यांना तीन दिवसाच्या अंतराने कोरोना टेस्टला सामोरे जावे लागणार आहे. स्पर्धेदरम्यान 30 हजार कोरोना टेस्ट होतील. याशिवाय सुरक्षित बायो-बबलसाठी डॉक्टर्ससह अन्य मेडिकल स्टाफला हॉटेलमध्येच थांबवण्याचा निर्णय घेण्यात आला आहे.

2019 नंतर पहिल्यांदा प्रेक्षकांना एन्ट्री

IPLच्या दुसऱ्या टप्प्यातील सामन्यासाठी मर्यादित प्रेक्षकांना स्टेडियममध्ये प्रवेश देण्यात येणार आहे. 2019 नंतर पहिल्यांदा स्पर्धेसाठी प्रेक्षकांची उपस्थिती दिसणार आहे. स्टेडियमच्या क्षमतेच्या 50 टक्के लोकांना प्रवेश दिला जाणार असल्याची माहिती समोर आली आहे.