IPL 2021 Mumbai Indians Playoffs Equation: कोलकाता संघाने गुरूवारी राजस्थानविरूद्धच्या सामन्यात तब्बल ८६ धावांनी मोठा विजय मिळवला. या विजयासह कोलकाताने Top 4 मध्ये स्थान पटकावले. कोलकाताने शेवटचा साखळी सामना जिंकत १४ सामन्यात १४ गुणांसह आणि तगड्या नेट रनरेटसह चौथं स्थान गाठलं. त्यामुळे आता मुंबईच्या संघाला जर 'प्ले-ऑफ्स'ची फेरी गाठायची असेल, तर शेवटच्या साखळी सामन्यात मुंबईला भल्या मोठ्या फरकाने सनरायजर्स हैदाराबादच्या संघाला पराभूत करावेच लागेल.

पाहा काय आहे मुंबई इंडियन्सचं 'प्ले-ऑफ्स'साठीचं समीकरण

- सर्वात महत्त्वाचं म्हणजे सध्या कोलकाताचा संघ गुणतालिकेत १४ गुणांसह चौथ्या क्रमांकावर आहे. त्यांचा नेट रनरेट +०.५८७ इतका आहे. तर मुंबईचे १३ सामन्यात १२ गुण असून त्यांचा नेट रनरेट -०.०४८ आहे.

- मुंबईच्या संघाला प्ले ऑफ्सचं तिकीट मिळवायचं असेल तर त्यांना हैदराबाद विरूद्धचा सामना २००पेक्षा अधिक धावा काढून सुमारे १७१ धावांनी जिंकावा लागेल.

- पण, हैदराबादच्या संघाने प्रथम फलंदाजी घेतली, तर मुंबईचा पत्ता त्याच वेळी कट होईल. कारण त्या परिस्थितीत मुंबईच्या संघाला कितीही मोठं लक्ष्य असलं तरीही पहिल्याच षटकात गाठावं लागेल.