दुबई : ‘‘श्रेयस अय्यर हा जागतिक दर्जाचा खेळाडू असून तो संघात परतल्यामुळे दिल्ली कॅपिटल्स संघाला फायदा होणार आहे,’’ असे मत दिल्ली कॅपिटल्स संघाचा मुख्य प्रशिक्षक व ऑस्ट्रेलियाचा माजी कर्णधार रिकी पाँटिंग याने व्यक्त केले आहे. कोरोनामुळे स्थगित कराव्या लागलेल्या आयपीएलच्या दुसऱ्या सत्राला येत्या १९ तारखेपासून सुरुवात होत आहे व त्यासाठी पाँटिंग संघाच्या ताफ्यात सामील झाला आहे. श्रेयस अय्यरही दुखापतीमुळे पाच महिन्यांनंतर संघात पुनरागमन करत आहे.

‘‘श्रेयस एक असा खेळाडू आहे जो कायम हसतमुख असतो, सर्वांशी मनमोकळेपणाने गप्पा मारून त्यांना प्रेरित करतो, मीही अनेकदा त्याच्याशी संवाद साधतो. त्यामुळे तो संघात परतल्याने संघाची बाजू भक्कम झाली आहे. तो एक जागतिक दर्जाचा खेळाडू आहे, यात कसलीही शंका नाही.’’ असे पाँटिंग या वेळी म्हणाला.

तसेच आयपीएलच्या दुसऱ्या सत्रासाठी संघात दाखल होताना आनंद होत असून खेळाडूही स्पर्धापूर्व सराव शिबिरामध्ये चांगला उत्साह दाखवत असल्याचे मत पॉंटिंगने यावेळी मांडले आहे. पुढे तो म्हणाला की, ‘‘मी दिल्ली कॅपिटल्सच्या ताफ्यामध्ये परत येण्यासाठी चार महिन्यांपासून वाट पाहत आहे. जेव्हा मी संघासोबत काम करत असतो तेव्हा माझा वेळ खूप छान जातो. माझ्या कॅलेंडर वर्षातील हा एक चांगला वेळ असतो. सध्या खेळाडू चांगला उत्साह दाखवत असून त्यांची सरावातील तीव्रता आणि वृत्ती पाहून हे स्पर्धापूर्व प्रशिक्षण शिबिर मुख्य स्पर्धेसाठी अत्यंत फायदेशीर ठरणार आहे. दुसऱ्या सत्रासाठी मी अत्यंत उत्सुक आहे.’’ असे ४६ वर्षीय पाँटिंगने बोलताना म्हटले आहे.