Suryakumar Yadav IPL: इंडियन प्रीमियर लीग 2024 स्पर्धेत रविवारी (7 एप्रिल) मुंबई इंडियन्सचा दिल्ली कॅपिटल्सविरुद्ध सामना होणार आहे. हा सामना दुपारी 3.30 वाजता वानखेडे स्टेडियमवर खेळवला जाणार आहे. या सामन्यापूर्वी मुंबई इंडियन्सला आनंदाची बातमी मिळाली आहे.

या सामन्यात खेळण्यासाठी मुंबई इंडियन्सचा स्टार खेळाडू सूर्यकुमार यादवही उपलब्ध असणार आहे. सूर्यकुमार या सामन्यासाठी उपलब्ध असल्याची माहिती संघसहकारी नमन धीरने दिली आहे, याबाबत पीटीआयने माहिती दिली आहे.

सूर्याची सरावालाही सुरुवात

सूर्यकुमारने मुंबई इंडियन्ससह सरावालाही सुरुवात केली आहे. त्याचे नेटमध्ये सरावाचे फोटो आणि व्हिडिओही शेअर केले आहेत. सरावादरम्यान, त्याचे मुंबई इंडियन्स संघातील खेळाडूंनी स्वागतही केले. तसेच त्याला पाहून आनंद झाल्याचे त्यांनी म्हटले आहे.

सूर्यकुमार गेल्या काही दिवसांपासून तंदुरुस्ती मिळवण्याचा प्रयत्न करत होता.  गुडघ्यावरील शस्त्रक्रिया आणि त्यानंतर स्पोर्टस हार्निया या दुखापतींमुळे त्याला बराच काळ क्रिकेटपासून दूर राहावे लागले होते.

त्यातूनच सावरल्यानंतर तो तंदुरुस्ती मिळवण्यासाठी बंगळुरूमधील राष्ट्रीय क्रिकेट अकादमीमध्ये होता. आता तो पूर्ण तंदुरुस्त झाला असून मुंबई संघात आयपीएल २०२४ साठी सहभागी झाला आहे.

मुंबईला विजयाची प्रतिक्षा

आयपीएल 2024 मध्ये हार्दिक पंड्याच्या नेतृत्वात खेळणाऱ्या मुंबई इंडियन्सला अद्याप विजयाची प्रतिक्षा आहे.

मुंबईने आत्तापर्यंत तीन सामने खेळले असून तिन्ही सामन्यात पराभव स्विकारला आहे. आता दिल्लीविरुद्ध वानखेडेवर होणाऱ्या सामन्यात मुंबई पहिल्या विजयासाठी प्रयत्न करेल.