PAK vs AFG T20 Match : अफगाणिस्तान क्रिकेटसाठी गेले दोन दिवस स्वप्नासारखे आहेत. राशिद खानच्या नेतृत्वाखालील अफगाणिस्तान संघाने दुसऱ्या टी-20 सामन्यात पाकिस्तानचा पराभव करून तीन सामन्यांची मालिका जिंकली आहे.

यजमान अफगाण संघाने शारजाह येथे खेळल्या गेलेल्या दुसऱ्या टी-20 सामन्यात पाकिस्तानचा 7 गडी राखून पराभव केला. यासह राशिद खान अँड कंपनीने मालिकेत 2-0 अशी अजेय आघाडी घेतली.

अफगाणिस्तानने याआधी पहिल्या टी-20 सामन्यात पाकिस्तानचा 6 गडी राखून पराभव केला होता, हा त्यांचा कोणत्याही फॉरमॅटमधील पाकिस्तानवरील पहिला विजय होता.(Latest Sport News)

पाकिस्तानचा कर्णधार शादाब खानने नाणेफेक जिंकून प्रथम फलंदाजी करण्याचा निर्णय घेतला. वेगवान गोलंदाज फझलक फारुकीने सामन्याच्या दुसऱ्या चेंडूवर सलामीवीर सॅम अय्युबला झेलबाद करून पाकिस्तानची सुरुवात खराब केली. 20 धावा गाठताना पाकिस्तानने 3 विकेट गमावल्या होत्या. फारुकीने शफीकला खाते उघडू दिले नाही, तर हॅरिस 9 धावा करून बाद झाला.

पाकिस्तानकडून इमाद वसीमने सर्वाधिक नाबाद 64 धावा केल्या. त्याने 57 चेंडूत 3 चौकार आणि 2 षटकार ठोकले. कर्णधार शादाब खान 32 धावा करून धावबाद झाला. पाकिस्तानने 6 गड्यांच्या मोबदल्यात 130 धावा केल्या. अफगाणिस्तानकडून फारुकीने सर्वाधिक 2 बळी घेतले. प्रत्युत्तरात अफगाणिस्तानने 1 चेंडू शिल्लक असताना 3 गडी गमावून 133 धावा केल्या.

131 धावांच्या लक्ष्याचा पाठलाग करताना अफगाणिस्तानची सुरुवात चांगली झाली. रहमानउल्ला गुरबाज आणि उस्मान घनी यांनी पहिल्या विकेटसाठी 30 धावांची भागीदारी केली. घनी 7 धावा करून बाद झाला. यानंतर गुरबाजला इब्राहिम झद्रानची साथ मिळाली. दोघांनी धावसंख्या 86 धावांपर्यंत नेली. गुरबाजने 49 चेंडूत 44 धावा केल्या. झद्रान 38 धावा करून बाद झाला, तर नजीबुल्ला झदरननेही 12 चेंडूत नाबाद 23 धावा केल्या. मोहम्मद नबी 9 चेंडूत 14 धावा करून नाबाद परतला. पाकिस्तानकडून जमान खान आणि इंशानुल्ला यांनी प्रत्येकी एक विकेट घेतली.