India at Paris olympics 2024 Live Update -भारताच्या पुरुष व महिला तिरंदाजी संघाने २५ जुलै रोजी झालेल्या पात्रता फेरीत दमदार कामगिरी करून उपांत्यपूर्व फेरीत थेट प्रवेश मिळवला. पण, शनिवारी रोईंगमध्ये भारताच्या बलराज पनवारची ( Balraj Panwar) थेट पात्रतेची संधी थोडक्यात हुकली, तर रमिता आणि अर्जुन बबुता यांनी १० मीटर एअर रायफल मिश्र सांघिक गटात पदकाच्या शर्यतीतून १ गुणाच्या फरकाने बाहेर पडावे लागले. पण, याच गटातून पॅरिस ऑलिम्पिक स्पर्धेतील पहिला पदक विजेता संघ मिळाला आहे.

१० मीटर एअर रायफल मिश्र सांघिक गटात चौथ्या क्रमांकावरील जर्मनीला ( ६२९.७) कांस्यपदकाच्या लढतीतत तिसऱ्या क्रमांकावर राहिलेल्या कझाकस्तान ( ६३०.८) सामना करावा लागला. चीनच्या हूआंग युतिंग आणि शेंग लिहाई हे ६३२.२ गुणांसह अव्वल स्थान पटकावले आणि दक्षिण कोरियाच्या केयूम जिहॉन व पार्क हाजून यांना ६३१.४ गुणांसह दुसरे स्थान मिळाले. चीन व कोरिया यांच्यात सुवर्णपदकाची लढत होणार आहे.

कांस्यपदकाच्या लढतीत कझाकस्तानच्या ले अॅलेक्झांड्रा व सॅतपायेव्ह इस्लाम यांनी जर्मनीच्या उलब्रिच मॅक्सिमिलयन व यान्सेन आना यांना कडवी टक्कर दिली. तिसऱ्या शॉट्सपर्यंत दोन्ही संघांमध्ये ३-३ अशी बरोबरी होती, परंतु कझाकच्या नेमबाजांनी सलग सहा शॉट्समध्ये प्रत्येकी २ गुण मिळवताना १७-५ अशी भक्कम आघाडी घेऊन कांस्यपदक नावावर केले.