Pro Kabaddi League, PKL 2021 : प्रो कबड्डी लीग स्पर्धेतील 20 वा सामना यूपी योद्धा (UP Yoddha) आणि गुजरात जायएंट्स (Gujarat Giants) यांच्यात रंगला होता. दोन्ही संघातील थरारक सामना सरशेवटी 32-32 बरोबरीत सुटला. यंदाच्या हंगामातील तिसरा सामना टाय झाल्याचे पाहायला मिळाले. या दोन्ही संघातील लढतीत प्रदीप नरवालने दमदार खेळ करुन आपल्यातील क्षमतेचा नजराणा दाखवून दिला. 11 पॉइंट्स मिळवत त्याने सुपर 10 ला गवसणी घातली.

या सुपर टेनसह एक खास विक्रम प्रदीप नरवालने (Pardeep Narwal) आपल्या नावे केला. प्रो कबड्डीच्या इतिहासात सर्वाधिक 1200 पॉइंट्स त्याच्या नावे जमा झाले आहेत. त्याने यादरम्यान 61 वेळा सुपर टेन करण्याचा पराक्रमही करुन दाखवला आहे.

पहिल्या हाफमध्ये गुजरातच्या संघाने 20-14 अशी आघाडी घेतली होती. सुरुवातीला यूपी योद्धाचा संघ कमी वेळात ऑल आउटच्या उंबरठ्यावर दिसत होता. पण सुरिंदर गिलने दोन गुण कमावत सामन्यात ट्विस्ट आणले. त्यानंतर यूपी योद्धानं राकेशला सुपरटैकलच्या माध्यमातून बाद केले. लढतीच्या 9 व्या मिनिटाला गुजरातने यूपी योद्धा संघाला ऑल आउट केले. यूपीचा संघ दुसऱ्यांदा ऑल आउटच्या छायेत आला होता. पण डिफेंडर्संनी सुपर टैकलच्या माध्यमातून प्रदीप नरवालला मैदानात आणले. पुन्हा मैदानात येतात प्रदीपनं गुण मिळवूनही दिले.

यूपी याद्धाने दुसऱ्या हाफमध्ये करो वा मरोच्या रेडमध्ये अजय कुमारला बाद केले. त्यानंतर प्रदीप नरवालने करो वा मरोच्या रेडमध्ये गुणांची कमाई केली. 24 व्या मिनिटाला यूपीनं गुजरातला ऑल आउट केले. प्रदीप नरवालशिवाय गुजरातच्या ताफ्यातील राकेश नरवालनेही सुपर 10 ला गवसणी घातली. अखेर रंगतदार सामना 32-32 असा बरोबरीत सुटला.