सिंगापूर : भारतीय बॅडमिंटनपटूंना सिंगापूर ओपन बॅडमिंटन स्पर्धेच्या पहिल्याच दिवशी निराशेचा सामना करावा लागला. पी. व्ही. सिंधू, साईना नेहवाल, लक्ष्य सेन, एच. एस. प्रणॉय या स्टार खेळाडूंना एकेरी गटाच्या लढतीत पराभवाला सामोरे जावे लागले. त्यामुळे त्यांचे आव्हान सलामीलाच संपुष्टात आले.

पी. व्ही. सिंधू हिला क्रमवारीत पहिल्या स्थानावर असलेल्या जपानच्या अकाने यामागुची हिच्याकडून महिला एकेरीत हार पत्करावी लागली. यामागुची हिने सिंधू हिचे कडवे आव्हान १८-२१, २१-१९, २१-१७ असे मोडून काढले. सिंधूचा एक तास व एक मिनिटात पराभव झाला. सातवी मानांकित रॅचनोक इंतनॉन हिने साईना नेहवालवर २१-१३, २१-१५ अशी मात केली. साईनाकडून कडवा प्रतिकार करण्यात आला नाही. अवघ्या ३३ मिनिटांमध्ये तिचा पराभव झाला. सुपनिदा केटथोंग हिने आकर्षी कश्‍यपवर २१-१७, २१-९ अशी मात केली.

पाचव्या मानांकित चाऊ टीएन चेन याने पुरुषांच्या एकेरीत लक्ष्य सेनचा कडवा संघर्ष १८-२१, २१-१७, २१-१३ असा मोडून काढला. पहिला गेम जिंकल्यानंतरही लक्ष्य याचा पराभव झाला. तिसरा मानांकित कोडाय नाराओका याने एच. एस. प्रणॉय याला २१-१५, २१-१९ असे सरळ गेममध्ये हरवले.

किदांबी, प्रियांशूचा विजय

एकीकडे भारतीय बॅडमिंटनपटूंकडून निराशा झाली असतानाच किदांबी श्रीकांत व प्रियांशू राजवत यांनी पुरुषांच्या एकेरीत विजय मिळवले आणि आगेकूच केली.