दोहा : भारताचा दुहेरीमधील अव्वल टेनिस खेळाडू रोहन बोपण्णा याने कतार ओपन टेनिस स्पर्धेमध्ये विजेतेपद मिळवले आहे. बोपण्णा याने ऑस्ट्रेलियाच्या मॅथ्यू एब्डेन याच्या साथीने २५० गुणांच्या कतार ओपनच्या अंतिम फेरीच्या लढतीत कोन्स्टंट लेस्टिन आणि व्हॅन डी झॅंडश्युल्प या जोडीचा अटीतटीच्या सामन्यात (५)६-७, ६-४ आणि १०-६ असा पराभव केला.

अंतिम सामन्यात बोपण्णा आणि एब्डेन जोडीने पहिला सेट टायब्रेकमध्ये गमावला. दुसऱ्या सेटमध्ये बोपण्णा आणि एब्डेन जोडीने चार वेळा प्रतिस्पर्ध्यांची सर्व्हिस भेदली आणि आघाडी घेत सेट ६-४ असा जिंकला. पहिल्या दोन सेटचा निकाल विभागून लागल्याने सामना टायब्रेकमध्ये खेळविला गेला. टायब्रेकमध्ये बोपण्णा- एब्डेन जोडीने सुरुवातीलाच ४-१ अशी आघाडी घेत कतारस्पर्धेमध्ये विजयाच्या दिशेने वाटचालीला सुरुवात केली. तर पुढे जाऊन त्यांनी टायब्रेक १०-६ असा जिंकला.

रोहन बोपण्णा यंदाच्या वर्षी जबरदस्त फॉर्ममध्ये असून, त्याने ऑस्ट्रेलियन ओपन ग्रँडस्लॅम टेनिस स्पर्धेच्या मिश्र दुहेरीमध्ये प्रवेश केला होता. मात्र सानिया मिर्झा सह खेळण्यात आलेल्या ऑस्ट्रेलियन ओपनच्या अंतिम सामन्यात त्याला पराभवाचा सामना करावा लगला होता. तर रॉटरडॅम येथे झालेल्या स्पर्धेमध्ये सुद्धा बोपण्णाला पुरुषांच्या दुहेरीमध्ये अंतिम फेरीत पराभूत व्हावे लागले होते. कतारमधील विजेतेपद हे बोपण्णाचे कारकिर्दीतील २३ वे विजेतेपद आहे.