BCCI Media Rights : बीसीसीआयच्या माध्यम हक्काचा लिलाव हा व्हायकॉम 18 ने जिंकला. त्यांनी डिज्ने स्टारला मागे टाकत भारताच्या द्विपक्षीय मालिकांसाठीचे माध्यम हक्क मिळवले आहे. हे माध्यम हक्क पुढच्या 5 वर्षांसाठी असणार आहे.

डिज्ने स्टार आणि सोनी स्पोर्ट्स नेटवर्क या शर्यतीत मागे पडले. मुकेश अंबानींच्या व्हायकॉम 18 ने या लिलावात जवळपास 6000 कोटींच्या पुढे रक्कम मोजली असल्याचा अंदाज वर्तवला जात आहे. बीसीसीआयला एका सामन्यासाठी जवळपास 67.8 कोटी रूपये मिळण्याची शक्यता आहे. (Viacom18 Seal Both TV & Digital Rights)

व्हायकॉम 18 ने बीसीसीआयच्या द्विपक्षीय मालिकांचे प्रसारण हक्क जिंकल्यानंतर बीसीसीआयचे सचिव जय शहा यांनी ट्विट करून माहिती दिली. ते म्हणाले की, 'बीसीसीआय प्रसारण हक्क लिलाव जिंकणाऱ्या व्हायकॉम 18 चे अभिनंदन. त्यांनी टेलिव्हिजन प्रसारण हक्क आणि डिजीटल प्रसारण हक्क पुढच्या 5 वर्षासाठी मिळवले आहेत.'

'आयपीएल आणि वुमन्स प्रीमियर लीग दोन्ही स्पर्धांमधील व्हायकॉम 18 सोबतच्या भागीदारीनंतर आता भारतीय क्रिकेट वाढीत ते बीसीसीआय प्रसारण हक्काद्वारेही योगदान देणार आहेत.'

जय शहा पुढे म्हणाला की, 'स्टार इंडिया आणि डिज्ने प्लस हॉट स्टारचे देखील आभार, त्यांनी बरीच वर्षे आम्हाला साथ दिली. जगाच्या कानाकोपऱ्यात पसरलेल्या भारतीय क्रिकेट चाहत्यांपर्यंत पोहचण्यासाठी तुम्ही महत्वाची भुमिका बजावली आहे.'

स्टार स्पोर्ट्सने भारताच्या आंतरराष्ट्रीय आणि स्थान सामने जवळपास 11 वर्षे प्रसारित केले. 2012 पासून देशात क्रिकेट बद्दलचं प्रेम वाढवण्यात आपले मोठे योगदान दिले आहे.

व्हायकॉम 18 ने यापूर्वी आयपीएल (Digital), महिला आयपीएल (WIPL), ऑलिम्पिक 2024, दक्षिण आफ्रिकेचे 2024 मधील मायदेशातील सामने, टी 10 लीग, रोड सेफ्टी सिरीज, एनबीए, सिरीज A, ला लिगा, लिग 1, डायमंड लीग. या स्पर्धांचे प्रसारण हक्क देखील मिळवले आहेत.

(Sports Latest News)