West Indies Vs India 2nd ODI : वेस्ट इंडीजने भारताचे 182 धावांचे आव्हान 36 षटकात 4 विकेट्सच्या मोबदल्यात पार केले. विंडीजचा कर्णधार शे होपने नाबाद 63 धावांची दमदार खेळी केली. त्याला केसी कार्टीने नाबाद 48 धावा करत चांगली साथ दिली. भारताकडून शार्दुल ठाकूरने सर्वाधिक 3 विकेट्स घेतल्या. मालिका आता 1 - 1 अशी बरोबरीत आली आहे.

दुसऱ्या वनडे सामन्यात प्रथम गोलंदाजी करणाऱ्या विंडीजने भारताचा पहिला डाव 181 धावात गुंडाळला. भारताकडून सलामीवीर इशान किशनने सर्वाधिक 55 धावांचे योगदान दिले. मात्र इतर फलंदाजांना फारशी चमक दाखवता आली नाही. विंडीजकडून शेफर्ड, गुडाकेश मोती यांनी प्रत्येकी 3 विकेट्स घेतल्या.

विंडीजच्या सलामीवीरांनी नाबाद अर्धशतकी भागीदारी रचल्यानंतर शार्दुल ठाकूरने दोन्ही सलामीवीरांना नवव्या षटकात बाद केले. मेयर्स 36 तर किंग 15 धावा करून बाद झाला.

भारताने 182 धावांचे आव्हान घेऊन मैदानात उतरलेल्या वेस्ट इंडीजने दमदार सुरूवात केली. सलामीवीर ब्रँडन किंग आणि कायल मेयर्स यांनी 53 धावांची सलामी दिली.

भारताच्या सात विकेट्स 150 च्या आत गेल्यानंतर शार्दुल ठाकूरने 16 धावांची खेळी करत भारताला थोड्याफार सन्मानजनक धावसंख्येजवळ पोहचवले. कुलदीपने नाबाद 8 धावा केल्या तर मुकेशने 6 धावांचे योगदान देत भारताला 181 धावांपर्यंत पोहचवले.

भारताचा निम्मा संघ 113 धावात माघारी गेल्यानंतर सूर्युकमार यादव आणि रविंद्र जडेजा यांनी भारताचा डाव सावरण्याचा प्रयत्न केला. या दोघांनी सहाव्या विकेटसाठी 33 धावांची भागीदारी रचली. मात्र ही भागीदारी रोमारियो शेफर्डने फोडली. त्यानंतर डावखुऱ्या गुडकेश मोतीने पुन्हा एकदा सूर्यकुमार यादवची शिकार केली. सूर्यकुमार यादव 24 धावांवर बाद झाला.

विंडीजने भारताचा निम्मा संघ 113 धावात गारद केल्यानंतर पावसामुळे खेळ थांबवण्यात आला.

भारताच्या फलंदाजीने दमदार सुरूवात करत नाबाद 90 धावा केल्या होत्या. मात्र त्यानंतर विंडीजच्या गोलंदाजांनी भारताच्या एका पाठोपाठ एक अशा 5 फलंदाजांना अवघ्या 23 धावात पॅव्हेलियनमध्ये परतले.

भारताचा कर्णधार हार्दिक पांड्या 7 धावा करून बाद झाला अन् त्याच्या पुढच्याच षटकात संजू सॅमसनला करीआने 9 धावांवर बाद केले.

इशान किशन बाद झाल्यानंतर आलेल्या अक्षर पटेलला अवघी एक धाव करता आली. त्याला शेफर्डने आपल्या बाऊन्सरने चकवा दिला.

शुभमन गिल बाद झाल्यानंतर इशान किशन देखील 5 धावांची भर घालून 55 धावांवर बाद झाला. शेफर्डच्या गोलंदाजीवर अथनाजेने त्याचा एक सुंदर झेल टिपला.

भारताचा सलामीवीर इशान किशनने विंडीजविरूद्धच्या सलग दुसऱ्या वनडे सामन्यात अर्धशतकी खेळी केली. त्याने गिलसोबत 90 धावांची सलामी दिली. मात्र यानंतर गिल 48 चेंडूत 34 धावा करून बाद झाला.

भारताची युवा सलामी जोडी शुंभमन गिल आणि इशान किशन यांनी दुसऱ्या वनडे सामन्यात 11 षटकात अर्धशतकी सलामी दिली.

वेस्ट इंडीजने नाणेफेक जिंकून प्रथम गोलंदाजी करण्याचा निर्णय घेतला आहे.

दुसऱ्या वनडे सामन्यात भारतीय संघाने आपल्या प्लेईंग 11 मध्ये मोठे बदल केले आहेत. रोहित शर्मा आणि विराट कोहलीला विश्रांती दिली असून त्याच्या जागी अक्षर पटेल आणि संजू सॅमसन यांना संधी देण्यात आली. संघाचे नेतृत्व उपकर्णधार हार्दिक पांड्या करणार आहे.