अयोध्येतील राम मंदिर प्राणप्रतिष्ठा सोहळा सोमवार 22 जानेवारी रोजी मोठ्या थाटामाटात पार पडला. या सोहळ्यात देशभरातून हजारो मान्यवर सहभागी झाले होते. भारतीय क्रिकेट संघाचा कर्णधार रोहित शर्मा आणि स्टार फलंदाज विराट कोहली या दोघांनाही या कार्यक्रमासाठी आमंत्रित करण्यात आले होते, परंतु ते अयोध्येतील कार्यक्रमाला अनुपस्थित राहिले.

अयोध्येत सोमवारी झालेल्या राम मंदिर प्राणप्रतिष्ठा सोहळ्यासाठी देशभरातील विविध क्षेत्रात दिग्गज लोकांना आमंत्रित करण्यात आले होते. क्रिकेटविश्वातून सचिन तेंडुलकर, विराट कोहली, रोहित शर्मा, एमएस धोनी, अनिल कुंबळे, व्यंकटेश प्रसाद, मिताली राज, रवींद्र जडेजा यांना आमंत्रित करण्यात आले होते. परंतु, यापैकी फक्त सचिन तेंडुलकर, अनिल कुंबळे, व्यंकटेश प्रसाद, मिताली राज, रवींद्र जडेजा इत्यादींनी कार्यक्रमात भाग घेतला.

या भव्य कार्यक्रमात रोहित शर्मा आणि विराट कोहली कुठेच दिसले नाहीत. त्यामुळे चाहत्यांना प्रश्न पडला की ते का अनुपस्थित होता. सोमवारीच बीसीसीआयने ट्विट केले होते की, विराट कोहली काही वैयक्तिक कारणांमुळे भारत विरुद्ध इंग्लंड कसोटी मालिकेतील पहिल्या दोन सामन्यांसाठी उपलब्ध होणार नाही.

अशा स्थितीत विराट अयोध्या कार्यक्रमातून या कारणास्तव गायब असल्याचे मानले जात आहे. रोहित शर्माने अयोध्येतील अभिषेक समारंभाला जाण्याऐवजी इंग्लंडविरुद्धच्या कसोटी मालिकेसाठी सराव सत्राला उपस्थित राहण्यास प्राधान्य दिल्याचे सांगण्यात येत आहे.