Skin Care Tips : काकडी ही आपल्या आरोग्यासाठी अतिशय फायदेशीर आहे. काकडीमध्ये मोठ्या प्रमाणात पोषकघटकांचा समावेश आढळून येतो. या पोषकघटकांमध्ये व्हिटॅमिन्स आणि मिनरल्सचा समावेश असतो.

काकडीमध्ये भरपूर प्रमाणात पाणी देखील असते. त्यामुळे, आपले शरीर हायड्रेटेड ठेवण्यासाठी आणि त्वचेला हेल्दी ठेवण्यासाठी काकडीचा वापर केला जातो. कोरड्या त्वचेच्या समस्या दूर करण्यासाठी काकडी अतिशय लाभदायी आहे.

काकडीमध्ये मोठ्या प्रमाणात पाणी आढळून येते. या पाण्यामुळे त्वचा निरोगी आणि चमकदार राहण्यास मदत होते. त्वचेसाठी काकडीचा वापर तुम्ही वेगवेगळ्या प्रकारे करू शकता. आज आपण काकडीपासून बनवल्या जाणाऱ्या फेसपॅक्सबद्दल जाणून घेणार आहोत.

काकडी आणि कोरफडचा फेसपॅक

कोरड्या त्वचेसाठी हा फेसपॅक अतिशय फायदेशीर आहे. काकडीसोबतच कोरफड देखील त्वचेसाठी लाभदायी आहे. कोरफड आणि काकडीचा हा फेसपॅक त्वचेला हायड्रेट ठेवण्याचे काम करते.

हा फेसपॅक बनवण्यासाठी काकडी धुवून घ्या. तिचे साल काढा आणि काकडी किसून घ्या. आता या किसलेल्या काकडीमध्ये कोरफड जेल किंवा कोरफडीचा गर घाला. हे मिश्रण एकत्र करून या फेसपॅकने चेहऱ्यावर १५ मिनिटे मसाज करा. त्यानंतर हा फेसपॅक चेहऱ्यावर २० मिनिटांसाठी ठेवा. त्यानंतर, चेहरा धुवून टाका.

काकडी आणि ओटमीलचा फेसपॅक

जर तुमच्या त्वचेवर प्रमाणापेक्षा जास्त पिंपल्स येत असतील किंवा तुमच्या चेहऱ्यावर डाग येत असतील तर हा फेसपॅक तुमच्यासाठी बेस्ट आहे. काकडी तुमच्या त्वचेला हायड्रेट ठेवण्याचे काम करते तर ओटमील त्वचेतील मृतपेशी काढून टाकण्यास मदत करते.

काकडी आणि ओटमीलचा फेसपॅक बनवण्यासाठी एक काकडी घ्या. तिचे साल काढून ती किसून घ्या. आता या किसलेल्या काकडीतील रस काढून घ्या. आता या काकडीच्या रसामध्ये २ चमचे ओटमील मिसळून त्याची पेस्ट तयार करा. या पेस्टमध्ये १ चमचा मध घाला आणि हे मिश्रण एकजीव करा.

त्यानंतर हा फेसपॅक तुमच्या चेहऱ्यावर लावा. त्यानंतर, २०-२५ मिनिटांनी चेहरा धुवून टाका. अधिक चांगल्या परिणामांसाठी हा फेसपॅक आठवड्यातून दोनवेळा चेहऱ्यावर लावा.