Skin Care Tips : सध्या सर्वत्र थंडीचा कडाका मोठ्या प्रमाणात वाढला आहे. वाढत्या थंडीमुळे आरोग्याच्या अनेक समस्या निर्माण झाल्या आहेत. आरोग्यासोबतच या थंडीचा त्वचेवर आणि केसांवर ही परिणाम होतो. थंडीमुळे त्वचा कोरडी होणे, त्वचेवर पिंपल्स येणे इत्यादी अनेक प्रकारच्या समस्या निर्माण होतात.

या समस्यांमुळे त्वचेवरील ग्लो देखील निघून जातो. त्यामुळे, त्वचा निस्तेज दिसू लागते. त्वचेवरील ग्लो नाहीसा होतो. त्वचेवरील हा ग्लो पुन्हा आणण्यासाठी आपण अनेक प्रयत्न करतो. महागड्या क्रीम्स, लोशन्स, फेसपॅक्स यांचा वापर करतो. मात्र, तुम्ही नाचणीचा वापर करून त्वचेच्या समस्या दूर करू शकता.

नाचणीचा फेसपॅक बनवण्यासाठी लागणारे साहित्य

• नाचणीचे पीठ

• दही

• लिंबाचा रस

• मध

नाचणीचा फेसपॅक या पद्धतीने बनवा

नाचणीचा फेसपॅक बनवण्याठी एका बाऊलमध्ये ३ चमचे नाचणीचे पीठ घ्या. त्यात १ चमचा दही मिसळा. त्यानंतर, त्यात लिंबाचा रस (1 चमचा) आणि मध (अर्धा चमचा) घाला. हे सर्व मिश्रण चांगल्या प्रकारे मिक्स करा आणि ही पेस्ट चेहऱ्यावर लावा.

परंतु, हा फेसपॅक चेहऱ्यावर लावण्यापूर्वी चेहऱ्याचे आधी स्क्रबिंग करून घ्या. चेहरा चांगल्या प्रकारे स्क्रब केल्यानंतर तुम्ही चेहऱ्यावर नाचणीचा फेसपॅक लावा. २० ते २५ मिनिटांसाठी हा फेसपॅक चेहऱ्यावर लावा. त्यानंतर, चेहरा धुवून टाका.

नाचणीचा फेसपॅक चेहऱ्यावर लावण्याचे फायदे

मृत त्वचा काढून टाकते

नाचणीचा फेसपॅक चेहऱ्यावर लावल्यानंतर १०-१५ मिनिटे चेहऱ्यावर मसाज करा. मसाज केल्यामुळे चेहऱ्यावरील मृत त्वचा काढून टाकण्यास मदत होते. यामुळे, त्वचेतील रोमछिद्रे स्वच्छ होतात आणि चेहऱ्यावरील ब्लॅकहेड्सची समस्या देखील दूर होण्यास मदत होते.

त्वचेला ठेवते हायड्रेटेड

नाचणी आपल्या आरोग्यासाठी अतिशय फायदेशीर मानली जाते. नाचणीमध्ये आढळून येणारे पोषकघटक हे आपल्या आरोग्यासोबतच त्वचेसाठी देखील अतिशय फायदेशीर आहेत.

नाचणीचा फेसपॅक चेहऱ्यावर लावल्यानंतर हे पोषकघटक आपल्या त्वचेला मॉईश्चराईझ ठेवते आणि त्वचेवर चमक आणण्यास मदत करते. शिवाय, पिंपल्सची समस्या देखील या फेसपॅकमुळे दूर होते. अधिक चांगल्या परिणामांसाठी तुम्ही आठवड्यातून २ वेळा या फेसपॅकचा चेहऱ्यावर वापर करू शकता.