मुंबई : उपमुख्यमंत्री देवेंद्र फडणवीस यांनी महायुतीचे उमेदवार ॲड. उज्ज्वल निकम यांच्या प्रचारार्थ मुंबईतील साकीनाका परिसरात सभा घेतली. या सभेतून देशभक्ती आणि दहशतवादावर भाष्य करताना काँग्रेससह ‘इंडिया’ आघाडीवर हल्लाबोल केला. काय होतास तू, काय झालास तू, अरे वेड्या असा कसा वाया गेलास तू, असे म्हणत फडणवीसांनी उद्धव ठाकरेंना पुन्हा डिवचले.

आपण दहशवाद्यांविरोधात लढा दिला. एक देशाच्या सीमेवर लढणारा आमचा सैनिक होता, दुसरा पोलिस होता, तर आमचा न्यायालयात लढणारा एक सैनिक म्हणजे उज्ज्वल निकम होते, असे म्हणत दहशतवादाच्या मुद्द्यावरून देवेंद्र फडणवीस यांनी काँग्रेसला लक्ष्य केले. माजी मुख्यमंत्री उद्धव ठाकरेदेखील तोंड बंद करून बसले आहेत. तसेच, उद्धव ठाकरे बोलायला तयार नाही, त्यांना चिंता मुठभर मतांची आहे, म्हणून ते तोंड बंद करून बसले आहेत, असे म्हणत फडणवीसांनी हल्लाबोल केला. 

ते म्हणाले, की उज्ज्वल निकम यांना उमेदवारी दिली तेव्हा काँग्रेसने फणा काढला, आपल्या हुतात्म्यांवर त्यांनी प्रश्नचिन्ह उपस्थित केले. मात्र, दहशतवादी कसाबला फाशी उज्ज्वल निकम यांच्यामुळे फाशी झाली.आधी आपल्या देशात दहशतवादी हल्ले करून जायचे आणि काँग्रेसचे सरकार फक्त निषेध करायचे. मात्र, पंतप्रधान मोदींनी सर्जिकल स्ट्राईक केला. त्यामुळेच, २०१९ नंतर आपल्या देशात हल्ला करण्याची हिंमत पाकिस्तानच्या बापाची देखील झाली नाही.