कडगाव : ‘राजर्षी शाहू महाराजांच्या (Rajarshi Shahu Maharaj) पुरोगामित्वाचा आणि सामाजिक कार्याचा वसा आणि वारसा जपत स्वर्गीय खासदार सदाशिवराव मंडलिक यांनी वाटचाल केली. त्यांचे आमच्यावर प्रचंड उपकार आहेत. जिल्ह्याच्या विकासातील त्यांचे योगदान मोठे आहे. प्रा. संजय मंडलिक यांना प्रचंड मताधिक्य देऊन स्वर्गीय खासदार सदाशिवराव मंडलिक यांना वंदन करूया,’ असे भावनिक आवाहन पालकमंत्री हसन मुश्रीफ (Hasan Mushrif) यांनी काढले.

कडगाव (ता. गडहिंग्लज) येथे प्रा. संजय मंडलिक यांच्या प्रचारार्थ आयोजित मेळाव्यात मुश्रीफ बोलत होते. यावेळी महायुतीचे उमेदवार प्रा. संजय मंडलिक (Sanjay Mandlik) म्हणाले, ‘माझी उमेदवारी मिळवण्यासाठी मुश्रीफ, खासदार धनंजय महाडिक यांचे मोठे योगदान आहे. ‘मान गादीला- मत मोदींना’ ही टॅगलाईन घेऊन निवडणुकीत उतरलो आहोत. केवळ शाहू महाराजांचा चेहरा पुढे करून आमदार सतेज पाटील खासदारकीही घरात ठेवण्यासाठी धडपडत आहेत.

माजी जिल्हा परिषद सदस्य सतीश पाटील-गिजवणेकर यांचेही भाषण झाले. यावेळी ‘गोडसाखर’चे संचालक बाळासाहेब देसाई, सरपंच अर्चना पाटील, उपसरपंच संजीवनी पाटील, बंटी पाटील, सदानंद पाटील, प्रकाश पताडे, किरण कदम आदी प्रमुख उपस्थित होते.