Loksabha election 2024 : लोकसभा निवडणुकीची रणधुमाळी अंतिम टप्प्यात येऊन पोहोचली आहे. त्यातच प्रियांका गांधीनी आक्रमक पवित्रा घेत भाजपकडून होत असलेल्या हल्ल्यांना प्रत्युत्तर दिलं.

'इंडिया टुडे'च्या मुलाखतीमध्ये प्रियांका गांधी म्हणाल्या की, आमच्या कुटुंबाबद्दल सातत्याने अपशब्द बोलले जात आहेत, तरीही आम्ही शांत रहायचं का? माझी शहीद आजी आणि माझे शहीद वडील यांना तुम्ही देशद्रोही म्हणणार आणि आम्ही गप्प रहायचं? असं चालणार नाही.

प्रियांका गांधी पुढे म्हणाल्या, आमच्या कुटुंबाने देशासाठी बलिदान दिलं असेल तर आम्हाला लाज वाटयला पाहिजे का? आम्ही शांत का रहायचं? मला गर्व आहे की माझ्या आजीने देशासाठी ३३ गोळ्या खाल्ल्या आहेत. या देशासाठीच माझे वडील शहीद झालेले आहेत.. त्यामुळे मी बोलणार आणि बोलतच राहणार.

''मादीजी जेव्हा मुलाखत देतात तेव्हा त्यांचं ते इमोशनल स्पीच नसतं का? आम्ही बोललो तर इमोशनल स्पीच म्हणून हेटाळणी केली जाते. आम्ही खरं बोलतो.. मी १९ वर्षांची असताना वडिलांच्या मृतदेहाचे तुकडे घरी आणले होते.. आमचा त्याग आहे, मग मी का बोलणार नाही?'' असं म्हणत प्रियांकांनी भावनांना वाट मोकळी करुन दिली.

भाजपकडून होत असलेल्या विधानांवरुन प्रियांका गांधी म्हणाल्या की, तुम्ही म्हणणार माझ्या वडिलांनी कायदे बदलले.. इंदिराजींची संपत्ती विनाकारण घेण्यासाठी कायदा बदलला.. असं म्हणणं वेडेपणा आहे. तुम्ही खोट्यावर खोटं बोलणार आणि आम्ही शांत राहणार? मला माझ्या कुटुंबावर गर्व आहे आणि मला अजिबात त्याची लाज वाटत नाही, असं म्हणत प्रियांका गांधींनी भाजपवर निशाणा साधला.