अठराव्या लोकसभा निवडणुकीसाठी देशात लवकरच निवडणूक सुरू होणार आहे. या निवडणूक प्रचारात राम मंदिराच्या आश्वासनाची पूर्तता हा सत्ताधारी भाजपचा अग्रक्रमाचा मुद्दा असेल. यावर्षी २२ जानेवारी २०२४ रोजी अयोध्येत राममंदिराच्या उद्‍घाटनाचा जो भव्य सोहळा झाला.

त्याचे कारणच लोकांना दिलेल्या घोषणेची पूर्ती आणि तिचा वापर करून आगामी निवडणूक जिंकणे हे असल्याचे राजकीय विश्‍लेषकांचे मत आहे. अयोध्येतील रामजन्मभूमीवरील वादग्रस्त बाबरी मशिदीचा पाडाव आणि तेथे प्रभू श्रीरामाचे भव्य मंदिर बांधणे हा भाजपचा गेल्या दहा निवडणुकांतील महत्त्वाचा अजेंडा होता.

या अजेंड्याभोवतीच ‘रामलल्ला आऍंगे, मंदिर वहीं बनाऍंगे’, ही निवडणूक प्रचार घोषणा भाजपने १९८९ च्या निवडणुकीत पहिल्यांदा दिली. भाजपचे नेते लालकृष्ण अडवानी यांच्या नेतृत्वाखाली निघालेल्या सोमनाथ ते अयोध्या या रथयात्रेत हीच घोषणा पहिल्यांदा ठळकपणे देशभर पोहोचली. परंतु विश्व हिंदू परिषद आणि बजरंग दल आहे या संघटना या घोषणेच्या उद्‍गात्या आहेत.

हा तो काळ होता जेव्हा रामजन्मभूमी आंदोलन तीव्र झाले होते. अयोध्येत, बंदिस्त असलेल्या रामलल्लाच्या मूर्तींचे टाळे काढण्याचा आदेश तत्कालीन पंतप्रधान राजीव गांधी यांनी दिला होता. मुस्लिम समाजाने या विरोधात जाऊन बाबरी मशीद ॲक्शन कमिटी स्थापन केली होती. त्यानंतर न्यायालयीन प्रक्रियेत हा वाद अडकला होता. इकडे मंदिर आंदोलन व रामलल्लांच्या पूजेच्या निमित्ताने विश्व हिंदू परिषद आणि बजरंग दलानेही देशभर विविध उपक्रम आणि आंदोलने सुरू केले. १९८९ च्या पालमपूर अधिवेशनात भाजपने पहिल्यांदा आपल्या निवडणूक घोषणापत्रात या मुद्याचा समावेश केला.