कोल्हापूर : ‘खासदार प्रा. संजय मंडलिक (Sanjay Mandlik) यांचा विजय निश्चित आहे. आता फक्त मताधिक्याची उत्सुकता आहे. कारण या निवडणुकीत पालकमंत्री हसन मुश्रीफ (Hasan Mushrif) कृष्णाच्या आणि खासदार धनंजय महाडिक अर्जुनाच्या भूमिकेत आहेत. त्यामुळे विजयाची खात्री आहे,’ असे प्रतिपादन आमदार राजेश पाटील (Rajesh Patil) यांनी केले. मार्केटयार्ड येथील सुप्रिम हॉल येथे महायुतीच्या नेत्यांची बैठक झाली. या वेळी ते बोलत होते.

प्रास्ताविक मुरगूडचे माजी नगराध्यक्ष राजेखान जमादार यांनी केले. यावेळी पालकमंत्री हसन मुश्रीफ म्हणाले, ‘प्रा. संजय मंडलिक यांना मत म्हणजे पंतप्रधान नरेंद्र मोदी (Narendra Modi) यांना मत आहे. विद्यार्थी, नवमतदार, व्यापारी यांच्या मतदानाबद्दल माझ्या मनात शंका नाही. परंतु, बहुजन समाजापर्यंत पोहोचण्याची गरज आहे. कोणत्याही परिस्थितीत प्रा. संजय मंडलिक यांना निवडून आणायचेच याची शपथ घ्या.’

प्रा. संजय मंडलिक म्हणाले, ‘पंतप्रधान नरेंद्र मोदी यांच्या माध्यमातून झालेले देशातील काम, महाराष्ट्रात मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांच्या मंत्रिमंडळाच्या माध्यमातून झालेले काम ही आमच्याकडे सांगण्यासारखी बाजू आहे. हे कामच जनतेपर्यंत पोहोचवा. विरोधी बाजूकडे सांगण्यासारखे कोणतेही काम नाही. त्यामुळे जनता निश्चित मोठ्या मताधिक्याने मला निवडून देईल.’

या वेळी आमदार प्रकाश आबिटकर, नाथाजी पाटील, माजी मंत्री भरमूआण्णा पाटील, माजी आमदार चंद्रदीप नरके, अमल महाडिक, सत्यजित कदम, युवराज पाटील, राहुल चिकोडे, उदयसिंह पाटील- कौलवकर, युवराज पाटील, पी. जी. शिंदे, आदिल फरास आदी उपस्थित होते.

मंडलिकांच्या विजयासाठी जिवाचे रान करणार : महेश जाधव

भाजपचे प्रदेश सचिव महेश जाधव म्हणाले, ‘कालचा विषय वेगळा होता. जे बोललो ते रोखठोक बोललो. परंतु, मनात काहीही नाही. भाजपच्या दहा हजारांहून अधिक पदाधिकाऱ्यांसह अहोरात्र काम करू. जीवाचे रान करून मंडलिकांना विजयी करू.’