Ajit Pawar Post: राष्ट्रवादी नेते आणि उपमुख्यमंत्री अजित पवार आपल्या कामांची, भेटीची आणि इतर गोष्टींची माहिती आपल्या सोशल मिडीयावर शेअर करताना दिसतात. अशातच अजित पवारांनी त्यांच्या सोशल मिडीया एक्स या अकाऊंट वरून शेअर केलेली पोस्ट चुकीची असल्याचा दावा करत शरद पवार गटाने ती चूक स्वीकारा पण भाजपप्रमाणे ट्विट डिलीट करू नका असं आवाहन करत अजित पवारांवर हल्लाबोल केला आहे.

अजित पवारांची पोस्ट काय?

उपमुख्यमंत्री अजित पवार यांनी सोशल मिडीया एक्सवरती एक फोटो आणि पोस्ट शेअर केली आहे. पोस्टमध्ये त्यांनी म्हटलं आहे, "अरुणाचल प्रदेशमधील राष्ट्रवादी काँग्रेस पार्टीचे आमदार आणि पदाधिकारी यांनी माझी सदिच्छा भेट घेतली. यावेळी त्यांचं मनापासून स्वागत केलं. या भेटीदरम्यान लोकसभा व विधानसभा निवडणुकीच्या पार्श्वभूमीवर चर्चा पार पडली", अजित पवारांची ही पोस्ट शेअर करत शरद पवार गटाने हल्लाबोल केला आहे.

अरुणाचल प्रदेशमध्ये गेल्या पंचवार्षिक निवडणुकीत राष्ट्रवादी काँग्रेस पक्षाकडून सहभागच घेण्यात आला नव्हता. तर मग आमदार झाले तरी कधी? असा सवाल शरद पवार गटाने उपस्थित केला आहे.

शरद पवार गटाचा हल्लाबोल

अजित पवारांच्या पोस्टला शरद पवार गटाने उत्तर दिलं आहे. "काय....? अरुणाचल प्रदेशमध्ये राष्ट्रवादीचे आमदार...? अहो, अरुणाचल प्रदेशमध्ये गेल्या पंचवार्षिक निवडणुकीत राष्ट्रवादी काँग्रेस पक्षाकडून सहभागच घेण्यात आला नव्हता... मग आमदार झाले तरी कधी ? हा आता... अदृश्य शक्तीच्या माध्यमातून राष्ट्रवादीचे आमदार अरुणाचलप्रदेशच्या यादीत दाखवले असतील, तर ती वेगळी गोष्ट...अरुणाचलप्रदेश आणि नागालँडमध्ये तितकाच फरक आहे जितका महाराष्ट्र आणि गुजरातमध्ये आहे, हे समजणं अत्यावश्यक आहे."

"आता घटनाबाह्य पद्धतीने सत्तेवर आल्यानंतर हा राज्या राज्यातील फरकांचा गोंधळ उडणारच म्हणा...! त्यामुळे ज्या भाजपसोबत आपण गेलात त्यांच्या, खोटं बोल पण रेटून बोल या परंपरेचा वाण नाही पण गुण लागला हे दुर्दैव !"

"आपला रोखठोक बाणा अजूनही शाबूत असेल तर, चूक स्वीकारा पण भाजपप्रमाणे ट्विट डिलीट करू नका, ही नम्र विनंती!", अशी पोस्ट सोशल मिडीयावर करत अजित पवारांवर हल्लाबोल केला आहे.