पुणेः पुण्यातला पिंपरी चिंचवड हा भाग अजित पवारांचा बालेकिल्ला समजला जातो. अजित पवारांशिवाय मतदारसंघांमध्ये पानही हालत नाही, असं राजकीय जाणकार बोलतात. पण आता पिंपरी चिंचवड शहरामध्ये अजित पवार यांना धक्का बसला आहे, त्यांच्या जवळच्या पदाधिकाऱ्यांनी साथ सोडली. तसं राजीनामा पत्र पदाधिकाऱ्याने पक्षाकडे सादर केलं आहे.

राष्ट्रवादी काँग्रेस पक्ष अजित पवार गटाचे पिंपरी चिंचवडचे शहराध्यक्ष अजित गव्हाणे यांनी पक्षाध्यक्ष सुनील तटकरे यांच्याकडे आपल्या शहराध्यक्ष पदाचा राजीनामा पाठविला आहे. अजित गव्हाणे यांच्यासोबत अजित पवार गटाचे पिंपरी चिंचवड शहरातील इतर काही पदाधिकाऱ्यांनी देखील आपल्या पदाचा राजीनामा पक्षाकडे पाठविला आहे.

राजीनामा सादर करणाऱ्या पदाधिकाऱ्यांमध्ये यश साने, राहुल भोसले आणि भालेकर यांच्या नावाचा समावेश आहे. 20 जुलैला पिंपरी चिंचवड शहरात राष्ट्रवादी काँग्रेसचे अध्यक्ष शरद पवार यांची पिंपरी चिंचवड शहरात जाहीर सभा आहे. या सभेत अजित गव्हाणे आणि अजित पवार गटाचे इतर काही पदाधिकारी शरद पवार यांच्या प्रमुख उपस्थितीत पक्षात प्रवेश करणार असल्याची शक्यता व्यक्त करण्यात येत आहे. आगामी विधानसभा निवडणुकीच्या पार्श्वभूमीवर पिंपरी-चिंचवड शहरात अजित पवार यांना शरद पवार यांनी मोठा धक्का दिल्याचं बोललं जातंय.

लोकसभा निवडणुकीत अजित पवार गटाला अपयश बघावं लागलं होतं. तर शरद पवारांच्या आठ उमेदवारांचा दणदणीत विजय झाला होता. लोकसभा निवडणुकीमध्ये पदरी आलेलं अपयश विधानसभेत भरुन काढण्यासाठी अजित पवार गटासह महायुतीमधील घटकपक्ष कामाला लागले आहेत. त्यातच पिंपरी चिंचवडमध्ये काही पदाधिकारी अजित पवारांची साथ सोडत आहेत.