बुलडाणा : स्वाभिमानी शेतकरी संघटनेचे नेते तथा स्त्रोद्योग महामंडळाचे माजी अध्यक्ष रविकांत तुपकर यांच्यावर सावळा गावातील एका इसमाने कुर्‍हाडीने हल्ला करण्याचा प्रयत्न केला. त्याचा प्रतिकार करताना श्री. तुपकर यांचे स्वीय सहायकाला छातीत मार लागला असून पोलिसांनी याप्रकरणी हल्लेखोराला अटक केली.

 हेही वाचा - धक्कादायक! चक्क अधिकारीच घेतात भूखंड रिकामे करून देण्याची सुपारी; नागपूरच्या धंतोली...

प्राप्त माहितीनुसार रविकांत तुपकर हे सायंकाळी पाच वाजताच्या सुमारास चिखली रोड वरील आपल्या जनसंपर्क कार्यालयात कार्यकर्त्यांशी चर्चा करीत बसलेले होते. यावेळी भाजपचे माजी जिल्हाध्यक्ष धृपदराव सावळे त्याठिकाणी आले होते. त्यांना सोडण्यासाठी श्री. तुपकर बाहेर आले नेमके याच वेळी सावळा येथील जनार्दन दगडु गाडेकर हा इसम हातात कुर्‍हाड घेऊन श्री. तुपकर यांच्या गाडीचा नंबर लिहीत होता. 

यावेळी तुपकर यांच्या स्वीय सहायकाने तू काय करीत आहे हे विचारताच त्याने त्याच्यावर कुर्हाड उगारले व तुपकर यांना शिवीगाळ केली. श्री तुपकर यांच्याकडेही तो हल्ला करण्यासाठी धावला. त्यावेळी त्यांचे अंगरक्षक व सहायकांनी मधे पडून त्याला थांबवले व पोलिसांच्या स्वाधीन केले. पोलिसांनी याप्रकरणी जनार्धन दगडू गाडेकर याच्याविरुद्ध गुन्हा दाखल केला असून त्याला अटक केली आहे. पुढील तपास बुलडाणा पोलिस करीत आहेत.

नक्की वाचा - "मेरा जमीर अब भी जिंदा है" असं म्हणत पोलिस...

स्वीय सहायक सौरभ पडघान याला तातडीने रुग्णालयात दाखल करण्यात आले असून त्यांच्यावर सामान्य रुग्णालयात उपचार सुरू आहेत. या घटनेने शहरात सर्वत्र खळबळ उडाली आहे्. विशेष म्हणजे या घटनेतील आरोपी जनार्दन गाडेकर याच्यावर श्री. तुपकर यांच्या शेतातील सोयाबीनची सुडी जाळल्याचाही आरोप आहे.

संपादन - अथर्व महांकाळ