मुंबईः पूर्वाश्रमीचे भाजप नेते आणि राष्ट्रवादी काँग्रेसचे ज्येष्ठ नेते एकनाथ खडसे आणि गिरीश महाजन यांच्यात मागच्या काही दिवसांपासून पुन्हा वाद उफाळला आहे. यावेळी राम मंदिरावरुन दोन्ही नेत्यांमध्ये तूतू-मैंमैं सुरु झाली आहे.

राम मंदिराच्या मुद्द्यावरुन बोलताना एकनाथ खडसे म्हणाले की, राम मंदिरासाठी मी दोनवेळा कारसेवक म्हणून सहभागी झालो होतो. त्यावेळी आंदोलनामुळे आम्ही ललितपूर जेलमध्येदेखील होतो. मात्र आमच्यासोबत गिरीश महाजन असल्याचं दिसलं नाही. महाजन नेमकं कोणत्या जेलमध्ये होते, हे माहिती नसल्याचं खडसे म्हणाले होते.

एकनाथ खडसे यांच्या आरोपांना गिरीश महाजन यांनी नाशिकमधून जोरदार प्रत्युत्तर दिलं. महाजन म्हणाले की, खडसेंचा मला इलाज करावा लागणार आहे. कारण त्यांच्या डोक्यावर परिणाम झालाय. गौण खनिज उत्खनन केल्याप्रकरणी खडसेंना १३७ कोटी रुपये भरावे लागतील आणि भोसरी जमीन प्रकरणात २७ कोटी रुपये दंड भरावा लागेल. त्यामुळे त्यांना चप्पल घेण्यासाठीसुद्धा पैसे उरणार नाहीत.

महाजन पुढे म्हणाले की, कारसेवा आंदोलनामध्ये आमचे फोटो देशभर गाजले होते. खडसे वेगळ्या जेलमध्ये होते. गुणवंतराव सरोदे, मी आणि वाय.जी. महाजन आम्ही वेगळ्या जेलमध्ये होतो. त्यामुळे खडसेंनी विनाकारण टीका करु नये.

गिरीश महाजन यांच्या जहरी टीकेला एकनाथ खडसे काय उत्तर देतात? हे बघावं लागणार आहे. मागच्या काही दिवसांपासून दोन्ही नेत्यांमध्ये कायम वाद उफाळून येत असल्याचं दिसून येत आहे.