गेल्या काही दिवसांपासून राज्याच्या राजकारणात मोठ्या घडामोडी घडताना दिसुन येत आहेत. अशातच राज्यात पक्षांतर मोठ्या प्रमाणावर होताना दिसुन येत आहे. अशातच उद्धव बाळासाहेब ठाकरे गटाचे खासदार आणि सचिव अनिल देसाई यांचे निकटवर्तीय, आणि उद्धव बाळासाहेब ठाकरे गटाची संघटना आणि प्रशासकीय कामाची संपूर्ण माहिती असणारे माहीतीगार मारुती साळुंखे यांनी शिवसेनेत जाहीर प्रवेश केला आहे.

मुख्यमंत्री एकनाथ शिंदे यांच्या वर्षा या शासकीय निवासस्थानी हा पक्षप्रवेश पार पडला आहे. मुख्यमंत्र्यांनी हातात भगवा झेंडा देत मारुती साळुंखे यांचं पक्षात स्वागत केलं आहे. मारुती साळुंखे यांच्या पक्षप्रवेशामुळे ठाकरे गटाला मोठा धक्का बसला आहे.

मारुती साळुंखे हे उद्धव बाळासाहेब ठाकरे गटाचे सचिव आणि खासदार अनिल देसाई यांचे अत्यंत निकटवर्तीय म्हणून ओळखले जातात. त्याचबरोबर गटातील आणि संघटनेची घडी बसवण्याची तसेच प्रत्येकाशी संपर्क ठेवून संघटना तळागाळापर्यंत कशी पोहचवावी याची जबाबदारी मारुती साळुंखे यांच्या खांद्यावर होती.

एकनाथ शिंदे यांनी शिवसेनेत बंड केल्यानंतर संघटनेची नव्यानं बांधणी करण्यासाठी मारुती साळुंखे यांच्यावर अनेक जबाबदाऱ्या सोपवण्यात आल्या होत्या. मात्र गेल्या काही दिवसांपासून उद्धव ठाकरे यांनी काँग्रेस-राष्ट्रवादीशी सलगी करून घेतलेली भूमिका त्यांना पटेना तसेच बाळासाहेबांचे विचार खऱ्या अर्थानं पुढे घेऊन जायचं असेल तर एकनाथ शिंदे यांच्या अधिपत्याखालील शिवसेनेत जाण्यावाचून दुसरा पर्याय नाही, हे त्यांनी ठरवलं आणि त्यानंतर शिवसेनेत जाहीर प्रवेश करण्याचा निर्णय घेतला असल्याची माहिती मारुती साळुंखे यांनी दिली आहे.

मारुती साळुंखे यांच्या शिवसेना प्रवेशामुळे ठाकरे गटाला मोठा धक्का बसला असून संघटनेची चांगल्या प्रकारे बांधणी करणारा एक मोहरा शिंदे गटाला मिळल्यामुळे त्यांना पक्षवाढीसाठी मोठा उपयोग होणार आहे. काल (रविवारी) पक्षप्रवेशावेळी शिवसेना सचिव संजय मोरे, शिवसेना प्रवक्त्या शीतल म्हात्रे यादेखील उपस्थित होत्या.