मुंबई : तामिळनाडूचे मुख्यमंत्री एमके स्टॅलिन यांचे पुत्र उदयनिधी स्टॅलिन यांनी सनातन धर्माबाबत वादग्रस्त वक्तव्य केल्याने खळबळ उडाली आहे. या वक्तव्यावर उदयनिधी यांनी स्पष्टीकरण दिले आहे. मात्र भाजपकडून उदयनिधी यांच्यावर कडाडून टीका करण्यात येत आहे. भाजपकडून करण्यात येत असलेल्या मुद्दावर विधानसभेचे विरोधी पक्षनेते विजय वडेट्टीवार यांनी प्रतिक्रिया दिली आहे.

वडेट्टीवार म्हणाले की, आपण मागील ९ वर्षांच्या काळात काहीही केलं नाही हे पंतप्रधान मोदींना माहित आहे. केवळ धर्मांध आणि जातीव विष पेरल्याने यश मिळत हे भाजपला माहित आहे. त्या दृष्टीने पंतप्रधान विधाने करत आहे.

सनातनचा इंडियाशी काही संबंध नाही. सनातनचा विषय तामिळनाडूत काढण्यात आला होता. आपल्याकडे केवळ विषय उचलायचं काम सुरू आहे. कर्नाटकमध्ये बजरंगबलीचा विषय काढला. पण तिथं निकाल काय आला, हे सर्वांना माहित आहे. देशात तेढ निर्माण होईल, अशी भावना असेल तर ते देशाला परवडणारे नसल्याचं वडेट्टीवार यांनी म्हटलं.

दहीहंडीचे नियोजन ही भाजपची स्टंटबाजीच आहे. मुंबईची तिजोरी खाली केली, एफडी मोडल्यात, आमदार-खासदारांना लाखो करोडो रुपये दिलेत. माजी नगरसेवकांना वीस-पंचवीस कोटी रुपये दिलेत. इतके वर्षे झालेत जेवढी तिजोरी भरली तेवढी खाली करण्याचं पाप केलं गेलं. आता त्याच पैशातून कमिशन खाऊन दहीहंडी साजरी केली जाते, असा आरोप वडेट्टीवार यांनी केला आहे.