नागपूर : ओबीसी समाजाच्या राजकीय आरक्षणासाठी भाजपच्यावतीने आज व्हेरायटी चौकात चक्काजाम आंदोलन (BJP agitation for obc reservation) करण्यात आले. यावेळी विरोधी पक्षनेते देवेंद्र फडणवीस (opposition leader devendra fadnavis) यांच्या नेतृत्वात हे आंदोलन करण्यात आले. यावेळी राजकीय बळी गेला तरी चालेल पण ओबीसींचं राजकीय आरक्षण परत घेऊनच राहू, अशी ठाम भूमिका विरोधी पक्षनेते देवेंद्र फडणवीस यांनी घेतली. यावेळी देवेंद्र फडणवीसांसह अनेक भाजपच्या नेत्यांना पोलिसांनी ताब्यात घेतले. (BJP agitation for obc reservation devendra fadnavis on obc reservation in nagpur)

ओबीसीला संविधानात भाजपने जागा दिली. ही जागा काँग्रेस राष्ट्रवादीने दिली नाही. आम्ही ओबीसीसाठी वेगळं खातं आम्ही तयार केलं. या आरक्षणाचे खरे मारेकरी कोण आहेत? तर दोन जणांनी ओबीसी आरक्षणविरोधात याचिका केली होती. त्यापैकी वाशिममधल्या काँग्रेसच्या आमदाराचा मुलगा आणि भंडाऱ्याचा काँग्रेसचा कार्यकर्ता आहे. मग ओबीसी आरक्षण रद्द करणारे हे काँग्रेस आहे, अशी टीकाही फडणवीसांनी केली.

महाविकास आघाडी सरकारच्या दुर्लक्षामुळे ओबीसी समाजाचे आरक्षण हिरावल्याचा आरोप भाजपचा आहे. सर्वोच्च न्यायालयाने मागासवर्गीय आयोग स्थापन करून ओबीसी समाजाचा इम्पेरिकल डाटा सादर करण्यास सांगितले होते. मात्र, तब्बल पंधरा महिने सरकारने टाळाटाळ केली. त्यामुळे न्यायालयाने ओबीसींचे राजकीय आरक्षण काढून घेतले आहे. ओबीसी समाजाला पुन्हा आरक्षण बहाल करावे. ओबीसी आरक्षण मिळत नाही तोपर्यंत आमची लढाई सुरू राहणार, असेही ते म्हणाले. यावेळी महापौर दयाशंकर तिवारी, खासदार डॉ. विकास महात्मे,आमदार क्रृष्णा खोपडे, मोहन मते, विकास कुंभारे, गीरिश व्यास, संगठन मंत्री डॉ उपेंद्र कोठेकर, महापालिकेतील सत्तापक्षनेते अविनाश ठाकरे आदी नेते उपस्थित होते.