जळगाव - मागील काही दिवसांपासून महाराष्ट्राच्या राजकारणात खातेवाटप आणि मंत्रीमंडळ विस्तार सर्वाधिक चर्चीला गेलेला विषय आहे. मात्र अजुनही याला मुहूर्त लागलेला नाही. त्यामुळे सरकारमध्ये अस्वस्थता असल्याचा आरोप विरोधकांकडून करण्यात येत आहे. त्यातच खातेवाटपाबाबत मंत्री गुलाबराव पाटील यांनी थोडी गडबड असल्याची कबुली दिली आहे.

गुलाबराव पाटील म्हणाले की, आज उद्यामध्ये मंत्रीमंडळाचा विस्तार होईल, मी त्यासाठीच थांबलो होतो, मात्र नाशिक येथील वणी गडावरील अपघाताची घटना घडली. त्यामुळे मला नाशिक यावं लागलं. मात्र आज दुपारपर्यंत किंवा सकाळपर्यंत मंत्री मंडळाचा विस्तार होईल असं मी ऐकतो आहे, असं पाटील यांनी म्हटलं.

अजित पवार यांना अर्थ खातं मिळेल का, यावर पाटील म्हणाले की, कुणाला काय खात मिळेल हा निर्णय वरिष्ठ ठरवतील. परंतु, तिसरा भिडू आल्यामुळे खातेवाटपात थोडी गडबड होणार आहे. मात्र याचा अर्थ असा नाही की, खातेवाटपावरुन एकमेकांमध्ये नाराजी राहिल, असही त्यांनी नमूद केलं. तसेच अर्थ खात्याच्या बाबतीत वरिष्ठ जो निर्णय घेतील तो सर्वांना मान्य राहिलं. मात्र तीन पार्टनर झाल्यामुळे थोडा विलंब होतोय, हे निश्चित, असंही त्यांनी नमूद केलं.