ठाकरे गटाचे नेते चंद्रकांत खैरे यांच्या मुलाची ऑडिओ क्लिप वाह्यरल झाली आहे. अधिकाऱ्यांच्या बदल्यासाठी पैसे घेतल्याचा आरोप केला जात आहे. अधिकाऱ्याच्या बदलीचे काम न झाल्याने दोन लाख रुपये परत मागण्यात आले आहेत. दरम्यान हा सगळा प्रकार महाविकास आघाडी सरकारच्या काळातील असल्याचे सांगण्यात येत आहे.

शिवसेनेचे ज्येष्ठ नेते चंद्रकांत खैरे (Chandrakant Khaire) यांचे चिरंजीव ऋषीकेश खैरे यांच्याकडे पैसे मागत असल्याची ही कथित ऑडिओ क्लिप सोशल मीडियावर व्हायरल झाली आहे. ऋषीकेश हे युवासेनेचे जिल्ह्यातील प्रमुख पदाधिकारी आहेत.

राज्यात मविआ सरकार असताना एका अधिकाऱ्याची वन विभागात बदली करून देण्यासाठी चंद्रकांत खैरे यांचे पुत्र ऋषीकेश खैरे यांनी एका व्यक्तीकडून २ लाख रुपये घेतल्याचा उल्लेख या ऑडिओ क्लिपमध्ये आहे. यामुळे जिल्ह्याच्या राजकारणात खळबळ उडाली आहे. या ऑडिओमध्ये सदरील व्यक्ती ऋषीकेश यांच्याकडे दोन वर्ष झाली बदलीचे कामही झाले नाही आणि माझे पैसेही परत मिळाले नाही असे सांगत आहे.

सदरील व्यक्ती मी घरातील सोनं-चांदी विकून दोन लाख रुपये दिले होते, तुम्ही कामही केले नाही आणि पैसेही देत नाही, त्यामुळे मी खूप अडचणीत आहे. तुम्ही मला हलक्यात घेत आहात, आता एकच तारीख सांगा आणि माझे पैसे परत द्या, अशी मागणी सदर करत आहे. तर त्या व्यक्तीला डिसेंबरच्या पहिल्या आठवड्यात शंभर टक्के पैसे देवून टाकतो, असे खैरे सांगत आहेत.