मुंबई : राज्याचे मुख्य सचिव सिताराम कुंटे (Sitaram Kunte) यांचा कार्यकाळ आज 30 नोव्हेंबरला संपला आहे. त्यामुळे आता राज्याचे मुख्य सचिव असलेली जबाबदारी देबाशिष चक्रवर्ती (Debashish Chakraborty) यांच्याकडेच सोपवण्यात आली आहे. देबाशिष चक्रवर्ती यांच्याकडे नियोजन विभागाचा कार्यभार आहे. त्यांच्याकडेच अतिरिक्त कार्यभार म्हणून ही नवी जबाबदारी सोपविण्यात आली आहे. देबाशिष चक्रवर्ती हे १९८६ बॅचचे आयएएस अधिकारी आहेत.

त्यामुळे मुख्य सचिव पदावरून निवृत्त झालेले सीताराम कुंटे यांचा प्रशासनातील प्रदीर्घ अनुभव लक्षात घेता त्यांची नियुक्ती मुख्यमंत्री सचिवालयात प्रधान सल्लागार या पदावर करण्यात आली आहे. मुख्यमंत्री उद्धव ठाकरे यांनी यासंदर्भातील निर्देश आज दिले.

राज्याचे मुख्य सचिव म्हणून सीताराम कुंटे यांची तीन महिन्यांनी मुदतवाढ करण्यात यावी असा प्रस्ताव राज्य सरकारने केंद्र सरकारकडे पाठवला होता. मात्र, सीताराम कुंटे यांच्या या मुदतवाढीचा प्रस्ताव अजूनही केंद्र सरकारने मंजूर केलेला नाहीये. त्यामुळे, देबाशिष चक्रवर्ती यांच्याकडे हा अतिरिक्त कार्यभार सोपविण्यात आला आहे.

याबाबत बोलताना राज्याचे उपमुख्यमंत्री अजित पवार यांनी म्हटलंय की, मावळते मुख्य सचिव सिताराम कुंटे यांचा मुदतवाढीचा प्रस्ताव केंद्राने का नाकारला हे तपासून पाहावं लागेल. कारण यापूर्वीच्या मुख्य सचिवांना दोनदा मुदतवाढ मिळाली होती. मुख्यमंत्र्यांशी बोलूनच याबाबत अधिकचं भाष्य करेन, असं त्यांनी म्हटलंय.

सरकारकडून कुंटेंच्या मुदतवाढीचा प्रस्ताव

सीताराम कुंटे हे 1985 च्या महाराष्ट्र बॅचचे अधिकारी आहेत. सीताराम कुंटे यांनी राज्यात आणि मुंबईत कोरोनाच्या संकटामध्ये चांगली कामगिरी बजावली आहे. मुख्यमंत्री उद्धव ठाकरे यांच्या विश्वासू अधिकाऱ्यांपैकी एक असे सीताराम कुंटे यांची ओळख आहे. त्यांचा कार्यकाळ आज म्हणजेच 30 नोव्हेंबरला संपला आहे. त्यामुळे सीताराम कुंटे यांना राज्याचे मुख्य सचिव म्हणून आणखी तीन महिन्यांची मुदतवाढ देण्याचा प्रस्ताव राज्य सरकारने केंद्राकडे पाठवला होता. पण सीताराम कुंटे यांच्या मुदतवाढीचा प्रस्ताव अद्याप केंद्र सरकारने मंजूर केला नाही.