मुंबई- राज्याचे माजी गृहमंत्री आणि राष्ट्रवादी काँग्रेसचे नेते अनिल देशमुख यांना सीबीआयने क्लीनचिट दिल्याचं समोर आलं आहे. यामुळे महाविकास आघाडी सरकाला मोठा दिलासा मिळाला आहे. काँग्रेसने या मुद्द्यावरुन मोदी सरकारवर हल्लाबोल केला आहे. काँग्रेस प्रवक्ते सचिन सावंत यांनी ट्विट करत मोदी सरकावर टीका केली. मोदी सरकारचे षड्यंत्र उघड झाले असून गृहमंत्री अमित शहा यांनी राजीनामा द्यावा, अशी मागणी त्यांनी केली आहे. अनिल देशमुख यांना क्लीनचिट मिळाल्याने महाविकास आघाडीचे नेते आक्रमक होणार हे स्पष्ट आहे. (Maharashtra Latest News)

अनिल देशमुख आणि महाविकास आघाडी सरकारला बदनाम करण्याचे मोदी सरकारचे षड्यंत्र उघड झाले आहे. प्राथमिक चौकशीत सीबीआयच्या तपास अधिकाऱ्याने असा निष्कर्ष काढला होता की परमबीर सिंह यांनी केलेल्या तथाकथित 100 कोटी वसूली आरोपात अनिल देशमुख यांची कोणतीही भूमिका नाही आणि चौकशी बंद केली होती, असं सचिन सावंत यांनी ट्विट करुन म्हटलं आहे.

तपास अधिकाऱ्याच्या अहवालाला बाजूला सारून सीबीआयने भूमिका कोणाच्या इशाऱ्यावर बदलली हे शोधण्यासाठी या षडयंत्राची सर्वोच्च न्यायालयाच्या अधीन चौकशी व्हावी. उच्च न्यायालयाने फक्त प्राथमिक चौकशी करा असे सांगितले असताना न्यायालयाची दिशाभूल करून FIR नोंदवणे हा CBI चा मोठा गुन्हा आहे, असा आरोप सावंत यांनी केला आहे.

गृहमंत्री अमित शहा यांनी जबाबदारी स्वीकारून तात्काळ राजीनामा दिला पाहिजे. या यंत्रणा मोदी सरकारच्या विरोधकांना लक्ष्य करण्यासाठी राजकीय शस्त्र कसे बनतात याचे हे स्पष्ट उदाहरण आहे. न्यायालयाची दिशाभूल केली जाते, नियम गुंडाळले जातात, चौकशा अंतहीन ठेवल्या जातात. अशी षड्यंत्रे फक्त हुकुमशाहीत घडतात. लोकशाही वाचवण्यासाठी संपूर्ण देश एकत्र येण्याची वेळ आली आहे. जाहीर निषेध!, असं सचिन सावंत म्हणाले आहेत.