बुलडाणा - राज्यभरात आज गणेश विसर्जनाचा जल्लोष आहे. अनेक ठिकाणी विसर्जनाची तयारी सुरू असताना बुलडाणा जिल्ह्यातून गणेश विसर्जन करून परतताना मंडळाच्या वाहनाला अपघात झाल्याचं समोर आलं आहे. या अपघातात, ट्रकने पेट घेतला.

नागपुर-मुंबई राष्ट्रीय महामार्गवरील खामगाव येथील जनुना तलाव येथून गणेश विसर्जन करून शहरात परत येताना जनुना चौफुल्लीवर अकोलाकडे जाणाऱ्या भरभाव ट्रकने ॲपेला जोरदार धडक दिली. या धडकेत ॲपे मधील गणेश मंडळाचे काही लोक हे जखमी झाले.

जखमी गणेशभक्तांना तात्काळ उपचारासाठी एका खाजगी रुग्णालयात दाखल केले. अपघातानंतर ट्रकने पेट घेतला होता. घटनास्थळी अग्निशमनदल पोहचले होते. गाडीतील फायर पंप नादुरुस्त असल्याने आग विझवण्यात वेळ लागला. त्यामुळे आगीने रौद्ररूप धारण केले होते.

सदर ट्रकमधील साबण जळून खाक झाल्या आहेत. यावेळी अग्निशमन दलाने पाण्याचा मारा करून आग आटोक्यात आणली.