छत्रपती संभाजी नगरः छत्रपती संभाजी नगरमध्ये नृत्यांगणा गौतमी पाटीलच्या कार्यक्रमात एक अपघात झाला आहे. शेड कोसळल्याने अनेक जण जखमी झाल्याची माहिती आहे.

मागील काही दिवसांपासून गौतमी पाटील चर्चेत आलीय. तिच्या लावणी आणि स्टेज शोच्या कार्यक्रमांना तुफान गर्दी होते. कार्यक्रमादरम्यान अनेक अपघाताच्या घटना यापूर्वीदेखील घडलेल्या आहेत. आज पुन्हा शेड कोसळल्याची घटना घडली आहे.

वैजापूर तालुक्यातील महालगाव येथे सोमवारी रात्री ही घटना घडली. गौतमी पाटीलच्या कार्यक्रमात पत्र्याच्या शेडवर काही तरुण मोठ्या संख्येने चढले होते. ते शेड कोसळल्याने तरुण जखमी झाले आहेत.

काही दिवसांपूर्वी गौतमीची आक्षेपार्ह ध्वनिचित्रफीत प्रसारित करण्यात आली होती. त्या तरुणास विमानतळ पोलिसांनी सातारा जिल्ह्यातून अटक केली. याबरोबरच एका विधीसंघर्षीत मुलाला देखील पोलिसांनी ताब्यात घेतले.

गौतमी ही अल्पावधीतच प्रसिद्धीच्या झोतात आली. गल्लीबोळात तिच्या नावाच्या चर्चा होऊ लागल्या आहेत. मात्र प्रसिद्धीचे फायदे आणि तोटेही सहन करावे लागत आहेत. तिच्या कार्यक्रमात भांडणं, अपघात असे प्रकार सर्रास घडतात. आजदेखील वैजापूरमध्ये शेड कोसळल्याने लोक जखमी झाले आहेत.

अब्दुल सत्तार म्हणाले होते...

सिल्लोडला मी गौतमी पाटीलचा कार्यक्रम ठेवला होता अजून एकदा ठेवू आणि अजित पवारांना निमंत्रण देऊ. गलतिया सबसे होती है, अजित पवार की छुप जाती है सत्तार की छप जाती है, अशा शब्दांत त्यांनी अजित पवारांवर निशाणा साधला होता.

अजित पवार यांनी अनेकदा गौतमी पाटीलबद्दल भाष्य केलेलं आहे. त्यामुळे गौतमीचा काही विषय आला की अजित पवारांची प्रतिक्रिया जाणून घेतली जाते.