मुंबई - आपल्या नृत्याने संपूर्ण महाराष्ट्राला अक्षरश: वेड लावणारी गौतमी पाटील सातत्याने चर्चेत आहे. त्यातच काही दिवसांपूर्वी तिच्या वडिलांचं निधन झालं होतं. यावरून गौतमीवर टीकाही झाली होती. मात्र आज गौतमीने आपल्या वडिलांविषयी आणि बालपणाविषयी अनेक आठवणी सांगितल्या. एबीपी माझा वृत्तवाहिनीवर ती बोलत होती.

गौतमी म्हणाली, धुळ्यातील सिंदखेडा आणि चोपड्यात माझं बालपण गेलं. मी पुण्यात येईल, याचा मी कधीही विचार केला नव्हता. आमची फॅमिली पुण्यात आली, जशी परिस्थिती समोर आली तशी मी घडत गेले. मी दहावीपर्यंत शिकले. आठवीनंतर दहावी पुण्यात केली.

दरम्यान मला माझ्या वडिलांविषयी काहीही माहिती नाही. मी आठवीला असताना वडिलांना पाहिलं आहे. माझे दोन्ही मामा पुण्यात होते. आमचे पुढे काय होणार, हा सगळा विचार करुन आम्ही पुणे शहरात यायचा निर्णय घेतला होता.

मी माझ्या वडिलांना पहिल्यांदा पाहिलं तेव्हा मी त्यांना ओळखलंही नव्हतं. मलाही वाटायचे वडील शाळेत यावे. पण तसे झाले नाही. वडील आहेत हे मला माहिती होतं. पण दुसरी कारणं माहिती नव्हते. पण खरा विषय म्हणजे ते खूप माद्य प्राशन करायचे. त्यांना पुण्यात नोकरी लावून दिली होती. मात्र ते व्यवस्थित राहिले नाहीत. त्यांना गावाला जायचेच होते. आमच्यासोबत त्यांना राहायचे नव्हते. त्यांनी काय केलं ते मी विसरुन गेले. आता ते नाहीत असंही गौतमीने सांगितलं

दरम्यान माझी आई सगळं काम करायची. तिनेच कंपन्यांमध्ये काम करून माझं पालनपोषण केल्याचं गौतमीने सांगितलं.