भारतीय जनता पक्षाचे पाचही उमेदवार निवडून येणार आहेत. आज कुणीतरी पावसात भिजलं तरीही त्याचा कोणताच परिणाम होईल असं मला वाटत नाही, असा अप्रत्यक्ष टोला भाजपाचे आमदार गोपिचंद पडळकर यांनी राष्ट्रवादीचे नेते शरद पवार यांना लगावला आहे. आज विधान परिषद निवडणुकीच्या पार्श्वभूमीवर पडळकर यांनी माध्यमांशी संवाद साधला. अपक्ष उमेदवारांची खासदार राऊतांनी कितीवेळा अब्रु घालवली आहे, जो काही निकाल आहे तो काही वेळात समोर येणार आहे, असंही ते म्हणाले आहेत. (Vidhan Parishad Election 2022)

पडळकर म्हणाले महाविकास आघाडीत काहीतरी गोंधळ उडला असल्याने बैठक घेण्यात आली आहे. भाजप ही लोकशाहीवर विश्वास ठेवणारा पक्ष आहे. याआधी 2019 ला राज्यांतील जनेतेचा विश्वासघात झाला होता. जनतेनं दिलेल्या मतांना धुडकावून, पाठीत खंजीर खुपसून सरकार स्थापन केलं होतं. यावेळी आमदारांना मत व्यक्त करण्याची पहिल्यांदा योग्य संधी मिळाली आहे. या लोकांतून आमदार निवडून आले होते, त्या लोकांनी 161 आमदार हे युतीचं सरकारसाठी निवडून दिले होते. त्यामुळे आज हे सगळे आमदार मतदानातून व्यक्त होतील, असा विश्वास त्यांनी व्यक्त केला.

पुढे ते म्हणाले, खासदार राऊतांनी अपक्ष आमदारांची आब्रु घालवली आहे. लोकांतून निवडून आलेल्या आमदरांवर आरोप करुन राऊतांनी या अपक्ष आमदारांच्या विश्वासार्हतेवर प्रश्नचिन्ह निर्माण केलं आहे. लोकांच्या मतांमुळे हे आमदार निवडून आले आहेत. मात्र असे आरोप करुन जनतेच्या मनात आमदारांविषयी मत कलुषित करण्याचा प्रयत्न झाला आहे. त्यामुळे हे सर्व आमदार आज मतदानाच्या माध्यमातून व्यक्त होतील असेही ते म्हणाले आहेत.