अंतरवाली सराटीः आई ओबीसी असेल तर मुलांनादेखील ओबीसी प्रमाणपत्र मिळालं पाहिजे, अशी मनोज जरांगे पटलांची मागणी आहे. शिवाय राज्य सरकारने सरसकट आरक्षणाची तारीख फेब्रुवारी महिन्यात नेवून ठेवीलय. त्यामुळे जरांगेंचं आंदोलन होणार, अशी शक्यता दिसून येतेय.

अंतरवाली सराटी येथे गुरुवारी सरकारचं एक शिष्टमंडळ मनोज जरांगे पाटील यांच्या भेटीसाठी दाखल झालं. यावेळी मंत्री गिरीश महाजन, मंत्री उदय सामंत, मंत्री संदीपान भूमरे यांची उपस्थिती होती.

मनोज जरांगे यांचं दुसरं उपोषण सुटलं त्यावेळी माजी न्यायमूर्ती गायकवाड आणि शुक्रे यांनी रक्ताचे नातेवाईक आणि सगेसोयरे यांना आरक्षण देता येईल, असं आश्वासन दिलं होतं. त्याप्रमाणेच आम्हाला आरक्षण द्या, अशी मागणी मनोज जरांगे पाटील यांनी केली आहे.

यावेळी मंत्री गिरीश महाजन यांनी सोयऱ्यांना आरक्षण देता येणार नाही, अशी भूमिका स्पष्ट केली. तसा कायदाच असून तो देशभर आहे. त्यामुळे आपल्याला आईप्रमाणे मुलांना ओबीसी प्रमाणपत्र देता येणार नाही, असं महाजन म्हणाले.

दुसरीकडे जरांगे पाटलांनी 'सोयरे' हा शब्द लावून धरत आम्हाला 'सरसकट' शब्दाला पर्यायी शब्द सगेसोयरे दिला होता, असं म्हटलं आहे. पुतण्याला आरक्षण मिळेल, हे मान्य. परंतु पुतण्या सोयरा होत नाही. मामा-भाचा, बायकोकडील नातेवाईक सोयर असतात; हे त्यांना माहिती नव्हतं का? असा प्रश्न जरांगेंनी उपस्थित केला. तुम्ही देश चालवता, तुम्हाला सोयरे कोण असतात आणि रक्ताचे नातेवाईक कोण असतात, हे माहिती नाही का? असाही थेट सवाल जरांगेंनी उपस्थित केला.

पुढे बीडमधील मराठा आंदोलकांनी पोलिसांनी ज्या नोटिसा पाठवल्या आहेत, त्यावर जरांगेंनी प्रश्न उपस्थित केला. १२५ जणांना कशामुळे नोटिसा दिल्या? जे लोक २३ तारखेच्या सभेच्या कामात आहेत, त्यांना नोटिसा दिल्यामुळे त्यांनी संताप व्यक्त केला.

ट्रॅक्टर चालकांना नोटिसा

वडिलांचीच जात मुलांना आणि चुलत भावांना लागेल, असं गिरीश महाजन यांनी स्पष्ट केलं आहे. यावेळी महाजनांनी मुंबईतील आंदोलनाचा मुद्दा उपस्थित केला. त्यावर जरांगे म्हणाले की, आम्ही अद्याप आंदोलनाची दिशा जाहीर केलेली नाही. तरीदेखील अनेक ट्रॅक्टर चालकांना नोटिसा देण्यात आलेल्या आहेत.