जालनाः बीडमध्ये ३० ऑक्टोबर रोजी झालेल्या हिंसाचाराच्या घटनेनंतर पोलिसांकडून निरपराध लोकांनाही गुन्हेगार म्हणून आरोपीच्या पिंजऱ्यात गोवलं जात असल्याचा आरोप करण्यात येतोय. या प्रकरणी मराठा आरक्षण लढ्याचे नेते मनोज जरांगे पाटील यांनी सरकारला इशारा दिला आहे.

एकीकडे अंतरवाली सराटी इथं मनोज जरांगे पाटील यांचं उपोषण सुरु असताना दुसरीकडे बीडमध्ये जाळपोळीच्या घटना घडल्या होत्या. निमित्त होतं आमदार प्रकाश सोळंके यांची ऑडिओ क्लिप. प्रकाश सोळंके यांनी मराठा आरक्षण आणि मनोज जरांगे पाटील यांच्याविषयी वक्तव्य केल्याने संतप्त जमावाने त्यांच्या घराच्या परिसरात जाळपोळ केली.

त्यानंतर बीड शहरात राष्ट्रवादी भवन पेटवून देण्यात आलं. कहर म्हणजे आमदार संदीप क्षीरसागर आणि संपूर्ण क्षीरसागर कुटुंब ज्या घरात वास्तव्याला आहे, त्या घरालाही आग लावण्यात आली. त्याचबरोबर माजी मंत्री जयदत्त क्षीरसागर यांचं कार्यालय, समता परिषदेचे विभागीय अध्यक्ष सुभाष राऊत यांचं हॉटेल आणि इतरही ठिकाणी जाळपोळ, दगडफेक झाली.

या प्रकरणी पोलिस मोठ्या प्रमाणावर कारवाई करत आहेत. परंतु आरोप असा आहे की, या कारवाईत काही निरपराध आणि ज्यांचा या प्रकरणाशी काहीही संबंध नाही अशांना केवळ द्वेषापोटी आरोपी केलं जात आहे. मराठा समाजाली तरुणांना या गोवलं जात असल्याचा ठपका पोलिसांवर ठेवण्यात येत आहे.

या प्रकरणी मनोज जरांगे पाटील यांनी सरकारला इशारा दिला आहे. सरकारने दोन दिवसांमध्ये अशा कारवाया थांबवाव्यात नसता बुधवारी नाईलाजाने संबंधित अधिकाऱ्यांची नावे जाहीर करणार असल्याचं त्यांनी म्हटलंय. त्यानंतर मराठा समाज रस्त्यावर उतरेल, त्यामुळे सरकारने शांतता भंग होऊ नये यासाठी अशा कारवाया थांबवाव्यात, असं आवाहन त्यांनी केलं.

जरांगे पुढे म्हणाले, बीडमधील हिंसाचाराच्या प्रकरणात जे खरे दोषी आहेत, त्यांच्यावर कारवाई करा. परंतु इतर मराठा समाजातीली तरुणांना लक्ष्य केलं जात आहे. मी सरकारच्या कानावर ही बाब घातलेली असून मराठा समाज आक्रमक झालाय, लोक रस्त्यावर उतरणार आहेत. सरकारने दोन दिवसांमध्ये अशा कारवाया थांबवाव्यात, असं ते म्हणाले.