पावसाच्या प्रतीक्षेत असलेल्या सर्वांसाठीच एक आनंदाची बातमी समोर आली आहे. आज (१० जून) नैऋत्य मॉन्सून अखेर कोकणात दाखल झाला आहे. भारतीय हवामानशास्त्र विभागाच्या (IMD) माहितीनुसार काही दिवसांच्या उशीराने नैऋत्य मॉन्सून अखेर शुक्रवारी गोव्यात दाखल झाला. शुक्रवारी सकाळपासूनच गोव्यातील उत्तर गोवा आणि दक्षिण गोवा या दोन्ही जिल्ह्यांमध्ये मॉन्सूनचा प्रभाव दिसून आला. (Monsoon Update southwest monsoon arrives in konkan information from indian meteorological department)

भारतीय हवामानशास्त्र विभागाने दिलेल्या माहितीनुसार, १० जून रोजी मॉन्सूनने मध्य अरबी समुद्राच्या आणखी काही भागात तसेच संपूर्ण गोवा आणि कोकण लगतच्या काही भागात प्रगती केली आहे. त्यामुळे पुढील ३ ते ४ दिवस या भागात मुसळधार पाऊस पडण्याची शक्यता असून यादरम्यान ताशी ४० किलोमीटर वेगाने वारे वाहण्याचा अंदाज आहे.

दरम्यान गोवा सरकारने १ जूनपासून खोल समुद्रात मासेमारीवर बंदी घातली आहे. तसेच भारतीय हवामान खात्याने मच्छिमारांना १४ जूनपर्यंत समुद्रात अजिबात न जाण्याचा सल्ला दिला आहे. आयएमडीच्या म्हणण्यानुसार, आता मान्सून उर्वरित महाराष्ट्राच्या दिशेने वेगाने सरकणार आहे. त्यामुळे राज्यभर लवकरच पावसाची शक्यता आहे.