मुंबईः महाराष्ट्र लोकसेवा आयोगामार्फत घेण्यात आलेल्या महाराष्ट्र राजपत्रित नागरी सेवा संयुक्त पूर्व परीक्षेनंतर आता विविध १६ संवर्गाच्या मुख्य परीक्षेची तारीख जाहीर करण्यात आलेली आहे.

राज्यसेवा मुख्य परीक्षा 2023 ची अधिसूचना आयोगाच्या संकेतस्थळावर प्रसिध्द करण्यात आलेली असून अर्ज सादर करण्याचा कालावधी दिनांक 7 ते 21 नोव्हेंबर 2023 असा आहे. तर परीक्षा दि. 20, 21 व 22 जानेवारी 2024 रोजी होतील.

महाराष्ट्र लोकसेवा आयोगाने अधिसूचनेमध्ये म्हटलंय की, दि. ४ जून २०२३ रोजी घेण्यात आलेल्या पूर्व परीक्षेचा निकाल ६ सप्टेंबर रोजी जाहीर करण्यात आला होता. त्या निकालाच्या आधारे आता संबंधित संवर्गाच्या मुख्य परीक्षेच्या प्रवेशासाठी ठरलेल्या उमेदवारांची ऑफलाईन पद्धतीने परीक्षा होईल. अमरावती, छत्रपती संभाजी नगर, नागपूर, नाशिक, नवी मुंबई आणि पुणे जिल्हा केंद्रांवर परीक्षा आयोजित करण्यात येणार आहे.

या भरती प्रक्रियेमध्ये उपजिल्हाधिकारी या संवर्गाचे ९ पदे आहेत. तर राज्यकर सहकाय्यक आयुक्त १२ पदे, उपमुख्य कार्यकारी अधिकारी/गटविकास अधिकारी ३६ पदे, सहायक संचालक ४१ पदे, सहायक कामगार आयुक्त १ पद, सहायक प्रादेशिक परिवहन अधिकारी ५१ पदे, सहायक आयुक्त २ पदे, सहायक आयुक्त ७ पदे, कक्ष अधिकारी १७ पदे, लोकसेवा आयोगातील कक्ष अधिकारी १ पद, सहकायक गटविकास अधिकारी ५० पदे, मुख्याधिकारी ४८ पदे, उप अधीक्षक भूमि अभिलेख ९ पदे, उप अधीक्षक, राज्य उत्पादन शुल्क ४ पदे, कौशल्य विकास, रोजगार व उद्योजकता मार्गदर्शन अधिकारी ११ पदे, उद्योग अधिकारी (तांत्रिक) ४ पदे; या पदांसाठी मुख्य परीक्षा होत आहे.