मुंबई : महाविकास आघाडीचे सरकार सत्तेवरून पायउतार होण्यास भाग पाडल्यानंतर आता भाजप - शिंदे गटाने महाराष्ट्र नवनिर्माण सेनेला सोबत घेऊन हिंदुत्ववादी मतांचे विभाजन रोखण्याची रणनीती आखण्यास सुरुवात केली आहे. यासाठी मुंबई , ठाणे, औरंगाबाद, नवी मुंबई, कल्याण-डोंबिवली, पुणे आणि नाशिक महानगरपालिका निवडणुकांवर लक्ष केंद्रित केले आहे.

मुंबई, ठाणे, कल्याण-डोंबिवली आणि औरंगाबाद या महापालिकांवर उद्धव ठाकरे यांच्‍या शिवसेनेची सत्ता काबीज करण्यासाठीच या तीन पक्षाची नवी युती आकारला येत असल्याचे मानले जात आहे. या रणनीतीला आकार देण्यासाठीच सध्या मनसे पक्षप्रमुख राज ठाकरे यांच्याशी भाजप आणि शिंदे गटाच्या भेटीगाठी वाढत असल्याचा अंदाज राजकीय वर्तुळात व्यक्त होत आहे. मुंबई महापालिका हे भाजपचे लक्ष्य आहे. त्यासाठी मनसेच्या सहकार्याची भाजपला गरज आहे.

आराखड्याची तयारी सुरू

मनसेबरोबर निवडणूक पूर्व युती करण्यासाठी भाजपमध्ये सखोल मंथन सुरू आहे. मुंबई महानगरपालिकेत मराठी बहुल प्रभागात मनसे आणि शिंदे गटाला झुकते माप द्यावे तर अमराठी बहुल प्रभागात भाजपला मनसे आणि शिंदे गटाने मदत करावी यासाठीचा आराखडा तयार होत असल्याची खात्रीलायक सूत्रांची माहिती आहे. ठाणे, कल्याण-डोंबिवली, औरंगाबाद आणि नवी मुंबईतही शिंदे गट आणि मनसेला प्राधान्य देत सत्ता काबीज करण्याचे डावपेच आखले जात आहेत. नाशिक व पुणे महापालिकेत भाजप आणि मनसे यांना शिंदे गटाचा सहयोग लाभल्यास इथेही भाजप प्रणित हिंदुत्वाच्या विचारांचा झेंडा फडकविण्यात यश मिळेल, अशी अटकळ बांधली जात आहे.

मतदारांचा मागोवा

तुर्तास मनसे सोबत थेट युती करण्याच्या मनःस्थितीत भाजप असला तरी याचा परिणाम उत्तर भारतीय मतदारांवर कसा होईल याचाही अंदाज बांधला जात आहे. यासाठी उत्तर भारतीय बहुल प्रभागात हिंदुत्वाच्या समान धाग्यावर या तिन्ही पक्षाने एकत्रपणे सामोरे जाण्याचा निर्णय घेतला तर त्याचे मतदारांमध्ये काय पडसाद उमटतात यासाठीची जोरदार चाचपणी सुरू आहे.