कऱ्हाड (सातारा) : मी अर्थमंत्रालय, इन्कम टॅक्स चेअरमन, ईडीचे संचालक, सहकार मंत्रालयामध्ये २७०० पेजेसचे पुरावे दिलेत. त्यावर चौकशी सुरु झालीय. मी अधिक माहितीही मागवलीय, ती माहिती दोन दिवसांत मला मिळून जाईल. ईडी आणि संचालक मंडळाकडून यांची चौकशी सुरु असून त्या भीतीनेच राष्ट्रवादीचे गुंड माझ्यावर हल्ला करत आहेत. या गुंड प्रवृत्तीच्या कार्यकर्त्यांना नक्कीच राष्ट्रवादीच्या अध्यक्षांचा वरदहस्त आहे, त्यामुळे ही व्यूहरचना शरद पवारांचीच (Sharad Pawar) असल्याचा गंभीर आरोप भाजप नेते किरीट सोमय्यांनी (BJP leader kirit somaiya) केलाय.

मुश्रीफांविरोधात (Hasan Mushrif) आणखी एक घोटाळा उघडकीस आणू, असं किरीट सोमय्यांनी म्हटलं होतं. त्यासाठी ते कोल्हापूरला येत असतानाच, कऱ्हाडमध्ये त्यांना पोलिसांनी उतरवलं. कोल्हापूरला जात असताना तिथं कायदा सुव्यवस्थेचा प्रश्न निर्माण होऊ नये, यासाठी त्यांना कऱ्हाडात पोलिसांनी ताब्यात घेतलं. त्यानंतर सोमय्या यांनी कऱ्हाडात आज पत्रकार परिषद घेऊन हसन मुश्रीफांसह शरद पवारांवर निशाणा साधला आहे.

हसन मुश्रीफ साहेब, 127 कोटी रुपये आपल्या कंपनीत मनी लाँड्रिंगचे आले, त्याचा हिशेब अजून का दिला नाही? पवार साहेब ही तुमची व्यूहरचना तर नाही ना?, असा सवाल देखील भाजप नेते सोमय्या यांनी उपस्थित केलाय. आप्पासाहेब नलावडे सहकारी साखर कारखान्यात मुश्रीफांनी 100 कोटींचा घोटाळा केला, तर सेनापती घोरपडे कारखाना आणि या कारखान्यात 50 कोटींचे व्यवहार झालेत. हे सरकार शरद पवार चालवत असून याची माहिती त्यांनाच आहे, असंही त्यांनी म्हटलंय. सरकार, हसन मुश्रीफांच्या स्वागतासाठी जनसमुदायाला परवानगी देतं. मग, मला कोल्हापुरात येण्यास परवानगी का नाही, असा सवालही त्यांनी उपस्थित केला आहे.