राष्ट्रवादी काँग्रेसचे अध्यक्ष शरद पवार यांनी दोन दिवसांपूर्वी आपल्या पदाचा राजीनामा देणार असल्याची घोषणा केली. त्यानंतर राजकीय वर्तुळात मोठी खळबळ उडाली आहे. अशातच महाविकास आघाडीतील मित्र पक्ष काँग्रेस नेत्यांनी राष्ट्रवादीची भाजपसोबत बोलणी सुरू असल्याचंही म्हटलं आहे.

यानंतर राष्ट्रवादी काँग्रेस आक्रमक झाल्याचे दिसून येत आहे. काँग्रेसचे प्रदेशाध्यक्ष नाना पटोले आणि ठाकरे गटाचे खासदार संजय राऊत यांच्या वक्तव्यानंतर राष्ट्रवादीचे आमदार अमोल मिटकरी यांनी दोन्ही नेत्यांवर टीका केली आहे.

अमोल मिटकरी बोलताना म्हणाले की, 'कोणी कोणाच्या पक्षात लक्ष घालण्यापेक्षा स्वतःच्या पक्षात लक्ष घालावे. तर शरद पवार राज्यभर फिरले म्हणुनच 2019 च्या निवडणुकीमध्ये काँग्रेसच्या जास्त जागा निवडून आल्या. काँग्रेसचे आमदार बोलतात पवार साहेब आले म्हणुन आम्ही आमदार झालोय. राष्ट्रवादीत काय सुरू आहे हा आमचा प्रश्न आहे' असं मिटकरी म्हणाले आहेत.

काँग्रेसने त्यात लक्ष घालू नये त्यांनी चिंतन करावं, अशी खोचक टीका अमोल मिटकरी यांनी केली. राष्ट्रवादीत काय सुरू आहे, यामध्ये संजय राऊत आणि काँग्रेसने लक्ष घालू नये, त्यांची त्यांचं दुकान पहावं. आमची भुमिका स्पष्ट आहे. आम्ही भाजपा विरुद्ध लढणार आहोत. महाविकास आघाडी म्हणुन लढणार आहोत. माझ्या पक्षात पातळी सोडून कोणी बोलत नाही. आमच्यामुळे महाविकास आघाडीत कुठेही फुट पडणार नाही. प्रत्येक पक्षाने आचार संहिता पाळावी, असंही मिटकरी पुढे म्हणालेत.