सिंधुदुर्ग : संतोष परब हल्लाप्रकरणी भाजप आमदार नितेश राणे (Nitesh Rane) यांना न्यायालयानं पोलिस कोठडी सुनावली होती. आज त्यांची कोठडी संपली असून त्यांना आता न्यायालयीन कोठडीत रवाना करण्यात आलं आहे. आज त्यांना परत न्यायालयात हजर करण्यात आलं होतं. मात्र, पोलिसांनी नितेश यांची कोठडी वाढवून देण्याची मागणी केल्यामुळे न्यायालयानं १८ फेब्रुवारीपर्यंत न्यायालयीन कोठडी दिली आहे. दुसरीकडे त्यांची तब्येत बिघडली असल्याची माहिती समोर येत आहे.

भाजपचे आमदार नितेश राणे यांना न्यायालयीन कोठडी सुनावल्यानंतर झालेल्या वैद्यकीय तपासणीत तब्येत बरी नसल्याचे समोर आल्याने त्यांना सिंधुदुर्ग जिल्हा रुग्णालयात दाखल करण्यात आले आहे. मात्र, पोलिस कोठडी संपली तरी आता त्यांचा मुक्काम कोठडीत असणार आहे.

काय आहे हे प्रकरण?

सिंधुदुर्गातील शिवसेना नेते संतोष परब यांच्यावर झालेल्या हल्ल्याप्रकरणी कणकवली पोलिसांनी मुख्य आरोपीला दिल्लीवरून अटक केली होती. त्यानंतर संशयाची सुई भाजप आमदार नितेश राणेंभोवती फिरत होती. त्यानुसार, त्यांच्या अटकेसाठी प्रयत्न सुरु झाले होते. पोलिस त्यांचा शोध घेत होते. पण, नितेश राणे कुठे होते? हे कोणाला माहिती नव्हते. शेवटी सर्वोच्च न्यायालयाने नितेश राणेंना न्यायालयाला शरण येण्यास सांगितले. त्यानंतर आता त्यांना अटक झाली आहे.