Onion issue meeting in Delhi: केंद्र सरकारने कांदा प्रश्न बोलवलेल्या दिल्लीतील बैठकीसाठी महाराष्ट्रातून फक्त पणन मंत्री अब्दुल सत्तार उपस्थित आहेत. कृषिमंत्री धनंजय मुंडे, अन्न व नागरी पुरवठा मंत्री छगन भुजबळ यांनी या बैठकीकडे पाठ फिरवली आहे. यामुळे विरोधक प्रश्न उपस्थित करत आहेत. 

केंद्राने कांदा निर्यातीवर लावलेल्या 40 टक्के शुल्क विरोधात व्यापाऱ्यांनी लिलाव बंद पाडले आहेत. यानंतर मुंबईत वाणिज्य मंत्री पियुष गोयल यांच्यासोबत बैठक झाल्यानंतर आज दिल्लीत महत्त्वाच्या बैठकीचे आयोजन करण्यात आले आहे. मात्र राज्यातील महत्वाच्या नेत्यांची या बैठकीकडे पाठ फिरवली आहे.

कांदा प्रश्नावर बोलवण्यात आलेल्या बैठकीबद्दल पणन मंत्री अब्दुल सत्तार म्हणाले, पणनचा विषय आहे. राज्यात अकोल्यात एक कार्यक्रम असल्यामुळं कृषिमंत्री येऊ शकले नाहीत, नाराजी वैगेरे काही नाही. मुंबईत बैठक झाली तेव्हा मंत्री पियुष गोयल यांचे अधिकारी नव्हते म्हणून आज पुन्हा बैठक होत आहे. (Latest Marathi News)

आज तोडगा निघावा अशी आमची इच्छा आहे, असे अब्दुल सत्तार म्हणाले. शेतकऱ्यांचे नुकसान होऊ नये यासाठी केंद्र सरकाने निर्णय घेतल्याचे देखील सत्तार यांनी स्पष्ट केले.