मुंबई: सुप्रिया सुळे (Supriya Sule) आणि शरद पवार (Sharad Pawar) साहेब यांना युक्रेनमधील (Ukraine) विद्यार्थ्याची चिंता लागली. महाराष्ट्रातील विद्यार्थी शाळेत पोहोचत नाहीत, त्याची ससेहोलपट होत आहे. त्यांची पवार साहेबांना चिंता का लागली नाही? तिकडे विमानं सोडण्याची मागणी करता पण मग इकडंच्या एसटीचं काय? इकडे एसट्या सोडा ना अशी टीका रयत क्रांती संघटनेचे प्रमुख सदाभाऊ खोत (Sadabhau Khot) यांनी केली. त्यांनी ट्विट करत निशाणा साधला.

एसटी कर्मचाऱ्यांचं आयुष्य उद्ध्वस्त करण्याचं काम राज्य शासन करत आहे. एसटी संदर्भातील त्रिसदस्यीय समितीचा अहवाल कामगार विरोधी आहे. त्याची आज विधानभवनाच्या समोर सदाभाऊ खोत आणि गोपिचंद पडळकर यांनी कागदपत्रांची होळी करत कर्मचाऱ्यांच्या मागण्यांच्या समर्थनार्थ आंदोलन केलं. यावेळी त्यांनी सरकारला इशाराही दिला.

सरकारवर निशाणा साधताना सदाभाऊ म्हणाले, एसटी कामगारांचा संप मोडायचा, ही सरकारची भावना आहे. कामगारांना देशोधडीला लावायचं, हाच सरकारचा मानस आहे. फक्त इतकंच नाही तर एसटीच्या खाजगीकरणाचा घाट या सरकारने घातलाय, त्यांना एसटीचं खाजगीकरण करुन हफ्ते वसूली करायचे आहेत असा आरोप सदाभाऊ खोत यांनी केला.

एसटी कर्मचाऱ्यांच्या प्रश्नावर बोलताना सदाभाऊ म्हणाले, एसटीत काम करणारी माणसं आमची शेता बांधावरची माणसं आहेत, खेड्यापाड्यावरची माणसं आहेत, यांची माती आम्ही होऊन देणार नाही. आता जर तुम्ही एसटी कामगारांना बांबू लावणार असाल, तर आम्ही तुम्हाला बांबू लावू असा सूचक इशाराही त्यांनी दिला.