मुंबई : खासदार नवनीत राणा आणि रवी राणा यांनी हनुमान चालिसा वाचण्यासाठी मुंबईत गोंधळ घातला. त्यानंतर शिवसैनिक देखील आक्रमक झाले होते. आता शिवसेना खासदार संजय राऊत (Sanjay Raut Allegations on Rana) यांनी राणा दाम्पत्यावर गंभीर आरोप केले आहेत. तसेच मुंबईत हनुमान चालिसा आणि भोंगे प्रकरणातून वातावरण बिघडविण्याचा प्रयत्न केला जात आहे. यामध्ये अंडरवर्ल्ड कनेक्शन असल्याचं तपासातून समोर येतंय, असं संजय राऊत म्हणाले.

राणा दाम्पत्य अचानक रामभक्त आणि हनुमान भक्त झाले. भक्तीमध्ये इतके बुडाले की त्यांनी मुंबईत येऊन धिंगाणा घातला. त्यांनी मातोश्रीला आव्हान देण्याचा प्रयत्न केला. हनुमान चालिसेवरून वातावरण बिघडविण्याचा प्रयत्न सुरू आहे. यामागे अंडरवर्ल्ड कनेक्शन आहे. १९९२ च्या दंगलीत पाकिस्तान, डी गॅंग कनेक्शन, माफिया टोळींचं कनेक्शन होतं. तसंच कनेक्शन या हनुमान चालिसा प्रकरणामागे आहे, असं तपासातून समोर आलं आहे. पोलिसांना देखील असंच दिसत आहे. मुंबईत घडणाऱ्या घडामोडींमागे डी-गँग, अडरवर्ल्ड कनेक्शन आहे, असं राऊत म्हणाले.

लकडावाला डी-गँगचा मुख्य फायनान्सर होता. त्याचे आणि राणा दाम्पत्याचे संबंध कसे आहेत? हे समोर आलं आहे. मग ईडीने त्यांची चौकशी का केली नाही? डी गँगसोबत संबंधित लोकांकडून पैसे घेणाऱ्यांची चौकशी का करण्यात आली नाही? अनिल देशमुख, नवाब मलिकांची चौकशी केली. मग राणा दाम्पत्य का सुटलं? त्यांना वाचविणाऱ्या कोणत्या आंतरराष्ट्रीय शक्ती आहे? त्यांची अनेक प्रकरणं आहेत. ती मी मुख्यमंत्र्यांकडे सुपूर्द केली आहेत. ते लवकरच पुढे पाठवतील, असंही संजय राऊतांनी सांगितलं.

राणा दाम्पत्यांनी केलेल्या गैरव्यवहाराबाबत लोकसभा अध्यक्ष ओम बिर्ला यांना पत्र लिहिणार आहे. कुठल्याही पक्षाने अशा डी-गँगसोबत कनेक्शन असलेल्या लोकांसोबत उभे राहू नये. देवेंद्र फडणवीस का गप्प बसले आहेत? त्यांनी नवनीत राणांसोबत पोलिस ठाण्यात जातीभेद केल्याचं म्हटलं होतं. पण, मुंबई पोलिसांनी व्हिडिओ जारी केल्यानंतर फडणवीस का बोलले नाही? भाजपचे पोपट का बोलत नाही? असे सवाल फडणवीसांनी उपस्थित केला आहे.