रत्नागिरी जिह्यातील राजापूर येथील पत्रकार शशिकांत वारिशे यांची हत्या करण्यात आली. वारिशे यांच्या अंगावर गाडी घालून त्यांची दिवसाढवळ्या हत्या करण्यात आली. ही घटना अपघात आहे असे दाखवण्याचा प्रयत्न करण्यात आला परंतु ही हत्या असल्याचे उघड झाले. या घटनेमुळे संपूर्ण राज्यात खळबळ उडाली आहे.

वारिशे यांच्या हत्येप्रकरणी शिवसेनेच्या ठाकरे गटाचे नेते, खासदार संजय राऊत यांनी राज्याचे उपमुख्यमंत्री व गृहमंत्री देवेंद्र फडणवीस यांना पत्र लिहिले आहे. ”राज्याचे गृहमंत्री म्हणून ढासळणाऱ्या कायदा-सुव्यवस्थेकडे मी आपले लक्ष वेधू इच्छितो. आपल्यासारख्या प्रशासनाचा मोठा अनुभव असलेल्या नेत्याकडे गृह विभागाचे नेतृत्व असताना राज्यात दिवसाढवळ्या खून पडावेत व संबंधित गुन्हेगारांना राजाश्रय मिळावा, हे चिंताजनक आहे.” असे राऊत यांनी या पत्रात लिहलं आहे.

कोकणातील नाणार रिफायनरीविरुद्ध लोकांमध्ये जागृती करणाऱ्या पत्रकाराची दिवसाढवळ्या हत्या होते. हे धक्कादायक आहे. देवेंद्र फडणवीस हे गृहविभागाचे नेतृत्व करीत असताना राज्यात खून होत आहेत. संबंधित गुन्हेदारांना राजाश्रय मिळावा, हे भीषण आहे अशी टीका ठाकरे गटाचे नेते खासदार संजय राऊत यांनी केली आहे.

राजापूर येथील तरुण पत्रकार शशिकांत वारिशे यांचा अपघात नव्हे तर ती हत्याच आहे. महाराष्ट्राच्या पुरोगामी प्रतिमेस कलंक लावणारी ही घटना आहे, अशा शब्दात संजय राऊत यांनी आपल्या भावना व्यक्त केल्या आहेत. राऊत यांनी देवेंद्र फडणवीस यांना याबाबत इशारा देणारे पत्र लिहिले आहे. तसेच लवकरच मी आणि शिवसेनेतील सहकारी रत्नागिरी, राजापूर येथे जाणार आहोत, अशी माहितीही राऊतांनी दिली आहे.

तर हे प्रकरण फास्ट ट्रॅक कोर्टात कसं नेता येईल आणि याचा लवकरात लवकर तपास पूर्ण केला जाईल असं राज्याचे गृहमंत्री आणि उपमुख्यमंत्री देवेंद्र फडणवीस यांनी म्हंटलं आहे.