पुणे : राष्ट्रवादी पक्षाचे अध्यक्ष शरद पवार यांना मारण्याची धमकी मिळाल्याचा प्रकार घडला होता. तुमचा दाभोळकर करू अशी धमकी फेसबुकवरून देण्यात आली होती. 'राजकारण महाराष्ट्राचे' या फेसबुक पेजवरून ही धमकी दिल्याप्रकरणी सागर बर्वे या तरूणाला गुन्हे शाखेने पुण्यातून अटक केली आहे.

पोलिसांनी दिलेल्या माहितीनुसार, नर्मदाबाई पटवर्धन या नावाच्या फेक अकाऊंटवरून ही धमकी देण्यात आली होती. पण या पाठीमागे सागर बर्वे या तरूणाचे कोणतेही राजकीय कनेक्शन पोलिसांना सापडले नाही. त्याच्या या कृत्यामागे वेगळेच कारण असल्याची माहिती मिळाली आहे. सागर बर्वे हा अविवाहीत असून त्याचे लग्न होत नसल्यामुळे तो तणावात असल्याची माहिती आहे.

लग्न होत नसल्याच्या तणावातच महाराष्ट्रात औरंगजेबाच्या फोटोवरून पेटलेल्या वादामुळे त्याला राग आला आणि त्यातूनच त्याने फेसबुकवर ही पोस्ट केली असल्याचं समोर आलं आहे. ही पोस्ट करण्यामागे माझा कोणताही हेतू नसल्यांच त्याने पोलिसांनी सांगितलं आहे. पण पवारांनाच धमकी का दिली? यासंबंधित अधिकचा तपास सुरू असल्याची माहिती पोलिसांनी दिली आहे.

दरम्यान, सौरभ पिंपळकर नावाच्या ट्वीटर अकाउंटवरूनही शरद पवार यांच्याविरोधात आक्षेपार्ह टिप्पणी करण्यात आली होती. त्याच्या बायोमध्ये "मी भाजपचा कार्यकर्ता असून मी धर्मनिरपेक्षतेचा तिरस्कार करतो" असं लिहिलं आहे. त्यामुळे हा भाजपचाच कट असल्याचा आरोप अनेक राजकीय कार्यकर्त्यांनी केला होता.