मुंबई- भाजप नेते आणि केंद्रीय मंत्री नारायण राणे (Union Minister Narayan Rane) यांना पोलिसांनी अटक केली आहे. राणे यांच्या अटकेनंतर त्यांच्या अधिकृत ट्विटर अकाऊंटवरुन ट्विट करण्यात आलं आहे. मुख्यमंत्री गुन्हा दाखल करण्यासाठी कलमं शोधत आहेत. उद्धव ठाकरे सचिवांना कलमं विचारत आहेत, असं उपरोधात्मक ट्विट राणे यांच्या ट्विटर अकाऊंटवरुन करण्यात आले आहे. असे असले तरी काही मिनिटातच हे ट्विट डिलिट करण्यात आले. (Maharahtra Latest News)

नारायण राणे यांनी मुख्यमंत्री उद्धव ठाकरे यांच्याविषयी केलेल्या वक्तव्यामुळे राजकीय वातावरण तापलं आहे. शिवसेना आणि भाजप कार्यकर्ते समोरासमोर आले असून त्यांच्यात तणावाचे वातावरण निर्माण झाले आहे. राणेंना पोलिसांनी अटक केल्याची माहिती आहे. राणे यांच्याकडून मुंबई हायकोर्टात अटकपूर्व जामीनासाठी याचिका दाखल करण्यात आली होती. पण, कोर्टाने यावर तातडीने सुनावणी करण्यास नकार दिला. त्यामुळे राणे यांच्या अडचणी वाढल्या होत्या. त्यानंतर अखेर त्यांना पोलिसांनी अटक केली आहे.

दरम्यान, अमृत महोत्सवी स्वातंत्र्यदिनाच्या भाषणाच्या दरम्यान मुख्यमंत्री उद्धव ठाकरे यांचा गोंधळ उडाल्याचं पाहायला मिळालं होतं. हा नक्की स्वातंत्र्याचा अमृत महोत्सव आहे की हिरक महोत्सव असा प्रश्न त्यांना पडला होता. त्यांनतर त्यांनी याबाबत मुख्य सचिव सिताराम कुंटे यांचा विचारणा केली. त्यांनी अमृत महोत्सवी स्वातंत्र्यदिन असल्याचं सांगितल्यानंतर मुख्यमंत्र्यांनी आपलं भाषण पूर्ण केलं. यामुद्द्यावरुन मुख्यमंत्र्यांवर टीका करताना नारायण राणे यांची जीभ घसरल्याचं पाहायला मिळालं. राज्याच्या मुख्यमंत्र्याला देशाच्या स्वातंत्र्याला किती वर्षे झाली हे विचारावे लागते. मी तिथे असतो तर कानाखालीच वाजवली असती, असं राणे म्हणाले. यानंतर राज्याचे राजकीय वातावरण तप्त झाले आहे.