केंद्रीयमंत्री नारायण राणे यांनी मुख्यमंत्री उद्धव ठाकरे यांच्याबाबत केलेल्या आक्षेपार्ह विधानानंतर मंगळवारी राज्यभर अभूतपूर्व असा महा‘राडा’ झाला. एकीकडे शिवसेना-भाजपचे कार्यकर्ते रस्त्यांवर परस्परांना भिडले असताना राज्य सरकारने राणे यांना अटक केली. या घटनेचे गल्लीपासून दिल्लीपर्यंत तीव्र पडसाद उमटले. पोलिसांनी राणे यांना रात्री उशिरा महाड सत्र न्यायालयात हजर करण्यात आले. सुमारे सव्वा तासाच्या सुनावणीनंतर न्यायालयाने त्यांना जामीन मंजूर केला. नारायण राणे यांच्या अटकेच्या कारवाईचं जोरदार समर्थन शिवसेनेचे खासदार विनायक राऊत यांनी केलं आहे. त्यानंतर आता विनायक राऊत यांच्या घरावर अज्ञातांकडून हल्ला करण्यात आला आहे.

विनायक राऊत यांच्या सिंधुदुर्गातील घरावर सोडा बॉटल फेकल्याची माहिती मिळाली आहे. चार अज्ञात बाईकस्वारांनी विनायक राऊत यांच्या सिंधुदुर्गातील तळगाव इथल्या बंगल्यावर सोडा बॉटल फेकल्याची माहिती मिळतेय. सोडा बॉटल फेकल्यानंतर हे चौघेही पळून गेले आहेत. दरम्यान, या हल्ल्यात राऊत यांच्या बंगल्याचं कुठलंही नुकसान झालेलं वृत्त नाही. विनायक राऊत यांच्या बंगल्यावर पोलिसांचा बंदोबस्त असताना हल्ला झाल्याचं समजतेय. विनायक राऊत यांच्या सुरक्षेत आणखी वाढ करण्यात आली आहे. विनायक राऊत यांच्यावर झालेला हा हल्ला राणे समर्थकांनी केला असल्याचा आरोप, शिवसैनिकांनी केला आहे. यावर आता शिवसेनेकडून काय प्रतिक्रिया येतेय हे पाहणं औत्सुक्याचं ठरणार आहे.

असे घडले अटकनाट्य
मंगळवारी सकाळपासून राणे यांच्या अटकेची चर्चा सुरू होती. भाजपलाही याची कुणकूण लागलीच होती रत्नागिरी जिल्हा सत्र न्यायालयात व मुंबई उच्च न्यायालयात अटक टाळण्याचे राणेंचे प्रयत्न अयशस्वी झाल्यानंतर पोलिसांनी अटकेची कारवाई करून त्यांना संगमेश्वर पोलिस ठाण्यात नेले. तेथून त्यांना महाड पोलिसांच्या ताब्यात देण्यात आले. तत्पूर्वी जिल्हा पोलिस अधीक्षक राणेंच्या अटकेसाठी पुढे आले; मात्र उच्च न्यायालयाचा निकाल आला नसल्याने सगळेच वेटिंगवर होते. अखेर तिथलाही जामीन अर्ज फेटाळल्याची अधिकृत माहिती आल्यानंतर अटकेच्या हालचालींना वेग आला. अखेर राणेंना ताब्यात घेऊन सर्व लवाजमा संगमेश्‍वरकडे रवाना झाला.