पुणे : महाराष्ट्र अंधश्रद्धा निर्मूलन समितीचे (अंनिस) कार्याध्यक्ष डॉ. नरेंद्र दाभोलकर यांच्या हत्येला २० ऑगस्ट रोजी आठ वर्षे पूर्ण होत आहेत. या पार्श्वभूमीवर त्यांच्या हत्येमागील सूत्रधारांचं काय झालं? त्यांना कधी पकडणार? असा सवाल अंनिसतर्फे राज्य शासनाला करण्यात आला आहे. डॉ. दाभोलकर यांच्या खुनातील संशयित आरोपी म्हणून सीबीआयने डॉ. वीरेंद्र तावडे, शरद कळसकर, सचिन अंदुरे, संजीव पुनाळेकर, विक्रम भावे यांना अटक करून त्यांच्यावर आरोपपत्र दाखल केलेले आहे. मात्र अमोल काळे या संशयित आरोपीविरुद्ध सीबीआयने अजूनही आरोपपत्र दाखल केलेले नाही. तसेच अमित डिगवेकर व राजेश बंगेरा या संशयित आरोपींच्या विरुद्ध देखील अजूनही आरोपपत्र दाखल करण्यात आलेले नाही. या खुनाचा तपास डॉ. तावडे व अमोल काळे यांच्या नावापर्यंत येऊन थांबलेला आहे. मात्र खुनामागील सूत्रधार कोण आहेत, हे अद्याप स्पष्ट झालेले नाही, अशी माहिती अंनिसचे राज्य कार्यकारी समिती सदस्य डॉ. हमीद दाभोलकर यांनी शुक्रवारी (ता. १३) पत्रकार परिषदेत दिली. अंनिसचे पदाधिकारी श्रीपाल लालवानी, मिलिंद देशमुख, नंदिनी जाधव, अरुण बुरुंडे यावेळी उपस्थित होते. १९ ऑगस्ट रोजी संध्याकाळी सात वाजता महर्षी शिंदे पुलावर कॅंडल मार्च तर २० ऑगस्ट रोजी मानवी साखळी आयोजित करण्यात आली आहे.

पी. साईनाथ यांचे व्याख्यान :

२० ऑगस्ट हा राष्ट्रीय वैज्ञानिक दृष्टिकोन दिन म्हणून देशात ठिकठिकाणी वैज्ञानिक दृष्टिकोनाचा जागर करणारे कार्यक्रम आयोजित केले जातात. तर पुण्यात डॉ. नरेंद्र दाभोलकर स्मृतिव्याख्यानमाला आयोजित केली आहे. त्याअंतर्गत यावर्षी ज्येष्ठ पत्रकार पी. साईनाथ या स्मृतिव्याख्यानासाठी वक्ते म्हणून उपस्थित राहणार आहेत. ‘भारतीय लोकतंत्र और विवेकवादी शक्तियों के सन्मुख चुनौतियां’ या विषयवार ते विचार मांडणार आहेत. ‘अंधश्रद्धा निर्मूलन समिती महाराष्ट्र’ या ट्रस्टचे अध्यक्ष प्रतापराव पवार हे या कार्यक्रमाचे अध्यक्ष असतील. कोरोना संकटामुळे ही व्याख्यानमाला आॅनलाईन होणार आहे. तर १४ ते २० ऑगस्ट २०२१ दरम्यान संध्याकाळी ६ वाजता विविध व्याख्याने आयोजित करण्यात आली आहे. अधिक माहितीसाठी अंनिसच्या www.antisuperstition.org या संकेतस्थळावर भेट द्या.

व्याख्यानांमध्ये सहभागी होण्यासाठी झूम लिंक :

https://us02web.zoom.us/j/82993944572?pwd=WGlmYzZHNUlTUTRickRaR3ZSSkptUT09